മോഹൻ ബഗാന്റെ വലിയ വിജയത്തോടെ ഡ്യൂറണ്ട് കപ്പിന്റെ പുതിയ സീസൺ ആരംഭിച്ചു. ഇന്ന് ബംഗ്ലാദേശ് ആർമി ടീമിനെ നേരിട്ട മോഹൻ ബഗാൻ എതിരില്ലാത്ത അഞ്ചു ഗോളുകളുടെ വിജയം നേടി. ആദ്യ പകുതിയിൽ തന്നെ മോഹൻ ബഗാൻ 3 ഗോളുകൾക്ക് മുന്നിൽ എത്തിയിരുന്നു. 15ആം മിനുട്ടിൽ രവി റാണയുടെ പാസിൽ നിന്ന് ലിസ്റ്റൺ കൊളാസോ മോഹൻ ബഗാന് ലീഡ് നൽകി.
30ആം മിനുട്ടിൽ കിട്ടിയ പെനാൾട്ടി ലക്ഷ്യത്തിൽ എത്തിച്ച് മൻവീർ സിംഗ് ബഗാന്റെ ലീഡ് ഇരട്ടിയാക്കി. 40ആം മിനുട്ടിൽ ലിസ്റ്റണും സുഹൈലും ചേർന്ന് നടത്തിയ ഒരു നീക്കത്തിന് ഒടുവിൽ സുഹൈൽ ബഗാന്റെ മൂന്നാം ഗോൾ നേടി. രണ്ടാം പകുതിയിൽ ഹ്നാംതെയും കിയാൻ നസീരിയും കൂടെ ഗോൾ നേടിയതോടെ മോഹൻ ബഗാന്റെ വിജയം പൂർത്തിയായി.