പാരീസ് സെന്റ് ജെർമെയ്ൻ എംബപ്പെയെ അവരുടെ ഫസ്റ്റ് ടീമിലേക്ക് തിരികെയെടുത്തു. ഇന്നലെ നടന്ന ചർച്ചകൾക്ക് ശേഷമാണ് എംബപ്പെയെ ടീമിനൊപ്പം പരിശീലനം നടത്താൻ ക്ലബ് അനുവദിച്ചത്. അടുത്ത മത്സരം മുതൽ എംബപ്പെ പി എസ് ജിക്ക് ആയി കളിക്കാനും സാധ്യതയുണ്ട്.
ക്ലബ്ബുമായുള്ള കരാർ നീട്ടാൻ വിസമ്മതിച്ചതിനെത്തുടർന്ന് ജപ്പാനിലെയും ദക്ഷിണ കൊറിയയിലെയും പ്രീ-സീസൺ പര്യടനത്തിനുള്ള ടീമിൽ എംബപ്പെയെ ഉൾപ്പെടുത്തിയിരുന്നില്ല. അവസാന ഒരു മാസമായി എംബപ്പെ ഫസ്റ്റ് ടീമിനൊപ്പം ആയിരുന്നില്ല പരിശീലനം നടത്തുന്നത്. അടുത്ത സീസണിൽ റയൽ മാഡ്രിഡിൽ ചേരാൻ ആഗ്രഹിക്കുന്നതിനാൽ എംബപ്പെ പുതിയ കരാർ ഒപ്പുവെക്കാനോ മറ്റു ക്ലബിലേക്ക് പോകാനോ തയ്യാറായിരുന്നില്ല. .
ലോറിയന്റിനെതിരായ പിഎസ്ജിയുടെ ലീഗ് 1 ഓപ്പണറിൽ എംബപ്പെ കളിച്ചിരുന്നില്ല. ആ മത്സരം ജയിക്കാൻ പി എസ് ജിക്ക് ആയുമില്ല. എംബപ്പെ പരിശീലനം പുനരാരംഭിച്ചാലും താരം ക്ലബിൽ തുടരുമോ എന്നോ ഇനി പി എസ് ജിക്കായി കളിക്കുമെന്നോ ഉറപ്പില്ല.