റയൽ മാഡ്രിഡ് വിടും എന്ന് പ്രഖ്യാപിച്ച ഡിഫൻഡർ നാച്ചോയ്ക്ക് ക്ലബ് നാളെ യാത്രയയപ്പ് നൽകും. മറ്റന്നാൾ ബുധനാഴ്ച, ജൂലൈ 24ന് പ്രാദേശിക സനയം ഉച്ചയ്ക്ക് 1:00 മണിക്ക് ആകും താരത്തെ ആദരിച്ചുകൊണ്ടുള്ള ചടങ്ങ് നടക്കുക. പ്രസിഡൻ്റ് ഫ്ലോറൻ്റിനോ പെരെസിൻ്റെ സാന്നിധ്യത്തിലാകും ചടങ്ങ്.
റയൽ മാഡ്രിഡ് വിട്ട് സൗദി ക്ലബായ അൽ ക്വദ്സിയയിലേക്ക് ആണ് നാച്ചോ പോകുന്നത്. രണ്ട് വർഷത്തെ കരാർ താരം അവിടെ ഒപ്പുവെച്ചു. നാച്ചോ കഴിഞ്ഞ ആഴ്ച ക്വദ്സയിൽ മെഡിക്കൽ പൂർത്തിയാക്കിയിരുന്നു.
നാചോ അവസാന 23 വർഷമായി റയൽ മാഡ്രിഡിനൊപ്പം ഉണ്ടായിരുന്നു. 23 വർഷം മുമ്പ് റയൽ മാഡ്രിഡിന്റെ അക്കാദമിയിൽ ചേർന്ന നാച്ചോ 2011 ഏപ്രിലിൽ വലൻസിയയ്ക്കെതിരായ മത്സരത്തിൽ ആയിരുന്നു റയലിനായി സീനിയർ അരങ്ങേറ്റം നടത്തിയത്. നാച്ചോ റയൽ മാഡ്രിഡിനായി ഇതുവരെ 400ൽ അധികം കളികൾ കളിച്ചിട്ടുണ്ട്. റയലിനൊപ്പം ആറ് ചാമ്പ്യൻസ് ലീഗ് അടക്കം 25 ട്രോഫികളും താരം നേടി. 33-കാരൻ ചാമ്പ്യൻസ് ലീഗിൽ മാത്രം ഇതുവരെ റയലിനായി 60ൽ അധികം മത്സരങ്ങൾ കളിച്ചിട്ടുണ്ട്.