ബാഴ്സലോണ മിഡ്ഫീൽഡർ ഫെർമിൻ ലോപ്പസിന് പരിശീലനത്തിലേക്ക് മടങ്ങി എത്തിയതിന് തൊട്ടുപിന്നാലെ വീണ്ടും പരുക്ക്. മൊണാക്കോയ്ക്കെതിരായ ചാമ്പ്യൻസ് ലീഗ് പോരാട്ടത്തിനുള്ള ടീമിലെത്തുമെന്ന് പ്രതീക്ഷിച്ചിരുന്ന ലോപ്പസിനെ പുതിയ പരിക്ക് കൂടുതൽ കാലം പുറത്തിരുത്തും.
ബാഴ്സലോണ ഒരു പ്രസ്താവനയോടെ പരുക്കിന്റെ വാർത്ത സ്ഥിരീകരിച്ചു: “ഇന്ന് രാവിലെ പരിശീലനത്തിനിടെ, ഫെർമിൻ ലോപ്പസിൻ്റെ വലതുവശത്തെ ക്വാഡ്രൈസെപ്പിലെ റെക്ടസ് ഫെമോറിസ് പേശിക്ക് പരിക്കേറ്റു. ഏകദേശം മൂന്നാഴ്ചയോളം അദ്ദേഹം പുറത്തിരിക്കുമെന്ന് പ്രതീക്ഷിക്കുന്നു.” പ്രസ്താവനയിൽ പറയുന്നു.
ഈ പരിക്ക് അദ്ദേഹത്തിൻ്റെ മുൻ പ്രശ്നവുമായി ബന്ധമില്ലാത്തതാണ് എന്നും ക്ലബ് അറിയിച്ചു. പരിക്ക് കാരണം ഡാനി ഓൾമോയെയും ബാഴ്സലോണക്ക് നഷ്ടമായിരുന്നു.
വ്യാഴാഴ്ച മൊണാക്കോയ്ക്കെതിരായ ചാമ്പ്യൻസ് ലീഗ് ഓപ്പണർ ഉൾപ്പെടെ പ്രധാന മത്സരങ്ങൾക്കായി ടീം തയ്യാറെടുക്കുമ്പോൾ വലിയ തിരിച്ചടിയാണ് ഈ വാർത്തകൾ.