ലാലിഗയിൽ അവസാന നിമിഷം വിജയം സ്വന്തമാക്കി ബാഴ്സലോണ. ഇന്ന് സെൽറ്റ വിഗോയെ നേരിട്ട ബാഴ്സലോണ ഒന്നിനെതിരെ രണ്ടു ഗോളുകൾക്ക് ആണ് വിജയിച്ചത്. ബാഴ്സലോണയുടെ രണ്ട് ഗോളുകളും നേടിയത് ലെവൻഡോസ്കി ആയിരുന്നു. ആദ്യ പകുതിയുടെ അവസാനം യമാൽ നൽകിയ അസിസ്റ്റിൽ നിന്നായിരുന്നു ലെവൻഡോസ്കിയുടെ ആദ്യ ഗോൾ.
ഈ ഗോളിന് 47ആം മിനുട്ടിൽ ഇയാഗോ ആസ്പസിലൂടെ സെൽറ്റ് വിഗോ മറുപടി പറഞ്ഞു. സ്കോർ 1-1. ഈ ഗോൾ നില 90ആം മിനുട്ട് വരെ തുടർന്നു. അവസാനം കിട്ടിയ പെനാൾട്ടി ലക്ഷ്യത്തിൽ എത്തിച്ച് ലെവൻഡോസ്കി ബാഴ്സലോണ വിജയം നൽകി. 25 മത്സരങ്ങളിൽ നിന്ന് 54 പോയിന്റുമായി ബാഴ്സലോണ ലീഗിൽ മൂന്നാമത് തുടരുകയാണ്.