ഈ സീസണിലെ ആദ്യ കൊൽക്കത്ത ഡർബിയിൽ ഈസ്റ്റ് ബംഗാളിന് വിജയം. സൂപ്പർ താരനിരയുമായി ഡ്യൂറണ്ട് കപ്പ് ഗ്രൂപ്പ് ഘട്ട മത്സരത്തിന് ഇറങ്ങിയ മോഹൻ ബഗാനെ മറുപടിയില്ലാത്ത ഏക ഗോളിനാണ് ഈസ്റ്റ് ബംഗാൾ തോൽപ്പിച്ചത്. കാർലസ് കൊദ്രതിന്റെ കീഴിൽ ഇറങ്ങിയ ഈസ്റ്റ് ബംഗാൾ മോഹൻ ബഗാനെതിരെ അവരുടെ ടാക്ടിക്സുകൾ കൃത്യമായി പ്രാവർത്തികമാക്കുന്നത് തുടക്കം മുതൽ കാണാൻ ആയി.
മത്സരത്തിന്റെ ആദ്യ പകുതിയിൽ ഗോൾ ഒന്നും പിറന്നില്ല. രണ്ടാം പകുതിയിൽ അറുപതാൻ മിനുട്ടിലാണ് ഏവരെയും ഞെട്ടിച്ചു കൊണ്ട് ഈസ്റ്റ് ബംഗാൾ ലീഡ് എടുത്തത്. നന്ദ കുമാർ ശേഖർ ആയിരുന്നു സ്കോർ. മനോഹരമായി ഡ്രിബിൾ ചെയ്ത് പെനാൾട്ടി ബോക്സിൽ കയറി തന്റെ ഇടം കാലു കൊണ്ട് കണ്ണഞ്ചിപ്പിക്കുന്ന സ്ട്രൈക്കിലൂടെ നന്ദ പന്ത് വലയിൽ എത്തിക്കുകയായിരുന്നു. സ്കോർ 1-0.
ഇതിനു ശേഷം മോഹൻ ബഗാൻ വലിയ സബ്ബുകൾ നടത്തി കളിയിലേക്ക് തിരികെ വരാൻ ശ്രമിച്ചു എങ്കിലും പരാജയം ഒഴിവാക്കാൻ അവർക്ക് ആയില്ല. ഈ വിജയത്തോടെ ഈസ്റ്റ് ബംഗാൾ 2 മത്സരങ്ങളിൽ നിന്ന് 4 പോയിന്റുമായി ഗ്രൂപ്പിൽ രണ്ടാം സ്ഥാനത്ത് എത്തി. 3 മത്സരങ്ങളിൽ നിന്ന് 6 പോയിന്റുമായി ബഗാൻ ഗ്രൂപ്പിൽ ഒന്നാമത് തന്നെ നിൽക്കുന്നു.