Category: Kerala Premier League

കേരള പ്രീമിയർ ലീഗിലെ എഫ് സി കൊച്ചിയുടെ മുന്നേറ്റം തുടരുന്നു. ഇന്ന് കൊച്ചിയിൽ വെച്ച് നടന്ന മത്സരത്തിൽ ശക്തരായ സാറ്റ് തിരൂരിനെ എഫ് സി കൊച്ചി പരാജയപ്പെടുത്തി. മറുപടിയില്ലാത്ത ഒരു ഗോളിനായിരുന്നു എഫ് സി കൊച്ചിയുടെ വിജയം. കളിയുടെ 26ആം മിനുട്ടിൽ റൂണി യൂസഫാണ് എഫ് സി കൊച്ചിക്ക് വിജയം നേടിക്കൊടുത്ത ഗോൾ നേടിയത്. റൂണിയുടെ ലീഗിൽ മൂന്നാം ഗോളാണിത്‌.

ഈ വിജയത്തോടെ നാലു മത്സരങ്ങളിൽ ഏഴു പോയന്റുനായി എഫ് സി കൊച്ചി ഗ്രൂപ്പിൽ ഒന്നാമതെത്തി. നാലു മത്സരങ്ങളിൽ നാലു പോയിന്റ് മാത്രമുള്ള സാറ്റ് തിരൂർ ഗ്രൂപ്പ് എയിൽ രണ്ടാമതാണ്.

ഉത്തര മലബാറിൽ നിന്ന് കേരള പ്രീമിയർ ലീഗിൽ കളിക്കുന്ന ആദ്യ ടീമായ ഷൂട്ടേഴ്സ് പടന്നയ്ക്ക് വിജയം. ഇന്ന് കേരള പ്രീമിയർ ലീഗിലെ തങ്ങളുടെ ആദ്യ മത്സരത്തിന് ഇറങ്ങിയ ഷൂട്ടേഴ്സ് പടന്ന കോവളം എഫ് സിയെ ആണ് പരാജയപ്പെടുത്തിയത്. തിരുവനന്തപുരത്ത് വെച്ച് നടന്ന മത്സരം ഒന്നിനെതിരെ മൂന്നു ഗോളുകൾക്കാണ് ഷൂട്ടേഴ്സ് പടന്ന വിജയിച്ചത്. പടന്നയ്ക്ക് വേണ്ടി സുർബിനും എറിക് വീക്സുമാണ് ഗോളുകൾ നേടിയത്. മറ്റൊരു ഗോൾ സെൽഫ് ഗോളുമായിരുന്നു.

കേരള പ്രീമിയർ ലീഗിലെ ഷൂട്ടേഴ്സ് പടന്നയുടെ ആദ്യ മത്സരമാണിത്. ക്വാർട്സ് ലീഗിൽ നിന്ന് പിന്മാറിയതു കൊണ്ടാണ് പടന്ന ലീഗിലേക്ക് എത്തിയത്. ഗ്രൂപ്പ് ബിയിലാണ് ഷൂട്ടേഴ്സ് പടന്ന മത്സരിക്കുന്നത്.

കേരള പ്രീമിയർ ലീഗ് നീണ്ട ഇടവേളയ്ക്ക് ശേഷം പുനരാരംഭിച്ച ദിവസം ഗോകുലം കേരള എഫ് സിക്ക് തകർപ്പൻ വിജയം. ഗോകുലം കേരള എഫ് സി റിസേർവ്സ് ഇന്ന് ഇ എം എസ് സ്റ്റേഡിയത്തിൽ വെച്ച് നടന്ന മത്സരത്തിൽ എതിരില്ലാത്ത മൂന്നു ഗോളുകൾക്ക് ഗോൾഡൻ ത്രഡ്സിനെ പരാജയപ്പെടുത്തി. തികച്ചും ഏകപക്ഷീയമായിരുന്നു ഇന്നത്തെ മത്സരം. കളിയുടെ 28ആം മിനുട്ടിൽ ഷിഹാദ് നെല്ലിപറമ്പനാണ് ഗോകുലം കേരള എഫ് സിക്കായി ആദ്യ ഗോൾ നേടിയത്.

74ആം മിനുട്ടിൽ ക്രിസ്റ്റ്യൻ സബായും 80ആം മിനുട്ടിൽ താഹിർ സമാനും ഗോകുലം കേരള എഫ് സിക്കായി ഗോളുകൾ നേടി. ഗോകുലം കേരള എഫ് സിയുടെ രണ്ടാം വിജയമാണിത്. ഈ ജയത്തോടെ ഗോകുലം കേരള എഫ് സി ഗ്രൂപ്പ് ബിയിൽ ഒന്നാമതെത്തി.

കേരള ഫുട്ബോൾ അസോസിയേഷൻ നടത്തുന്ന ഇത്തവണത്തെ കേരള പ്രീമിയർ ലീഗ് അവസാന ഘട്ടത്തിനായുള്ള ഫിക്സ്ചറുകൾ കേരള ഫുട്ബോൾ അസോസിയേഷൻ പുറത്തുവിട്ടു. മാർച്ച് 17 മുതലാണ് ലീഗ് പുനരാരംഭിക്കുന്നത്. സന്തോഷ് ട്രോഫി ക്യാമ്പ് ആരംഭിച്ച കാരണം പറഞ്ഞ് ജനുവരി ആദ്യത്തിൽ നിർത്തിവെച്ച് ലീഗ് അവസാന രണ്ട് മാസവും നടന്നിരുന്നില്ല.

മാർച്ച് 17ന് കോവളം എഫ് സിയും ഷൂട്ടേഴ്സ് പടന്നയും തമ്മിലുള്ള മത്സരത്തോടെ ആകും ലീഗ് വീണ്ടും ആരംഭിക്കുക. ലീഗിൽ ഇതുവരെ 10 മത്സരങ്ങൾ മാത്രമെ കഴിഞ്ഞിട്ടുള്ളൂ‌. ഗ്രൂപ്പ് എയിൽ ആർ എഫ് സി കൊച്ചിയും, ഗ്രൂപ്പ് ബിയിൽ എഫ് സി കേരളയുമാണ് ഇപ്പോൾ ഒന്നാമത് നിൽക്കുന്നത്.

കേരള ഫുട്ബോൾ അസോസിയേഷൻ നടത്തുന്ന ഇത്തവണത്തെ കേരള പ്രീമിയർ ലീഗ് അവസാനം പുനരാരംഭിക്കാൻ തീരുമാനിച്ചു. സന്തോഷ് ട്രോഫി ക്യാമ്പ് ആരംഭിച്ച കാരണം പറഞ്ഞ് ജനുവരി ആദ്യത്തിൽ നിർത്തിവെച്ച് ലീഗ് അവസാന രണ്ട് മാസവും നടന്നിരുന്നില്ല.. മാർച്ചിൽ 16ന് ലീഗ് പുനരാരംഭിക്കും എന്ന് കെ എഫ് എ അറിയിച്ചു. പുതിയ ഫിക്സ്ചചറുകളും കെ എഫ് എ പുറത്തു വിട്ടു.

ആദ്യ സന്തോഷ് ട്രോഫി ആയിരുന്നു കാരണം എങ്കിൽ പിന്നീട് ചില പ്രാദേശിക ടൂർണമെന്റുകൾ കാണിച്ചായിരുന്നു കെ എ എ ലീഗ് നീട്ടിയത്. കേരള പ്രീമിയർ ലീഗ് മാത്രം ലക്ഷ്യം വെച്ച് വിദേശ താരങ്ങളെ വരെ എത്തിച്ച് ടീം ഒരുക്കിയ ക്വാർട്സ് ലീഗ് നീട്ടിവെച്ചതിൽ പ്രതിഷേധിച്ച് ലീഗിൽ നിന്ന് പിന്മാറിയിരുന്നു. ലീഗ് നീളുന്നത് അമിത ചിലവുകൾ ഉണ്ടാക്കുകയും ക്ലബുകളെ കൂടുതൽ സാമ്പത്തിക പ്രസന്ധിയിൽ എത്തിക്കുകയും ചെയ്യും എന്ന കാരണം പറഞ്ഞായിരുന്നു ക്വാർട്സിന്റെ പിന്മാറ്റം.

ക്വാർട്സിന് പകരം ഷൂട്ടേഴ്സ് പടന്നയ്ർ കെ എഫ് എ ലീഗിലേക്ക് എടുത്തിട്ടുണ്ട്. ഷൂട്ടേഴ്സ് പടന്ന ഗ്രൂപ്പ് ബിയിൽ ആയിരിക്കും കളിക്കുക. ഷൂട്ടേഴ്സ് പടന്ന ആദ്യമായാണ് കേരള പ്രീമിയർ ലീഗിൽ കളിക്കുന്നത്. മാർച്ച് 16ന് എസ് ബി ഐയും കേരള ബ്ലാസ്റ്റേഴ്സും തമ്മിലുള്ള മത്സരത്തോടെ ആകും ലീഗ് വീണ്ടും ആരംഭിക്കുക. ലീഗിൽ ഇതുവരെ 10 മത്സരങ്ങൾ മാത്രമെ കഴിഞ്ഞിട്ടുള്ളൂ‌. ഗ്രൂപ്പ് എയിൽ ആർ എഫ് സി കൊച്ചിയും, ഗ്രൂപ്പ് ബിയിൽ എഫ് സി കേരളയുമാണ് ഇപ്പോൾ ഒന്നാമത് നിൽക്കുന്നത്.

കേരള പ്രീമിയർ ലീഗിൽ അവസാന രണ്ട് സീസണുകളിൽ മികച്ച പ്രകടനം കാഴ്ച വെച്ചിട്ടുള്ള ടീമാണ് എഫ് സി തൃശ്ശൂർ. അവർ ഈ വർഷത്തെ കേരള പ്രീമിയർ ലീഗിലും മികച്ച തുടക്കം തന്നെ സ്വന്തമാക്കി. ഇന്ന് ലീഗിലെ തങ്ങളുടെ ആദ്യ മത്സരത്തിൽ സാറ്റ് തിരൂരിനെ നേരിട്ട എഫ് സി തൃശ്ശൂർ ഒന്നിനെതിരെ രണ്ടു ഗോളുകൾക്കാണ് വിജയിച്ചത്. ജിബിൻ ദേവസ്സിയുടെ ഇരട്ട ഗോളുകളാണ് എഫ് സി തൃശ്ശൂരിനെ വിജയിപ്പിച്ചത്.

40, 49 മിനുട്ടുകളിൽ ആയിരുന്നു ദേവസ്സിയുടെ ഗോളുകൾ. ജിബിന്റെ ഒരു ഗോൾ ഫ്രീകിക്കിൽ നിന്നും ആയുരുന്നു. ഫസലു റഹ്മാൻ ആണ് സാറ്റിനു വേണ്ടി ഗോൾ നേടിയത്. സാറ്റ് തിരൂരിന്റെ ലീഗിലെ ആദ്യ തോൽവി ആണിത്. മൂന്ന് മത്സരങ്ങളിൽ നിന്ന് നാലു പോയന്റാണ് സാറ്റിന് ഇപ്പോൾ ഉള്ളത്.

എസ് ബി ഐക്ക് കേരള പ്രീമിയർ ലീഗിൽ വീണ്ടും സമനില. ഇന്ന് ഗ്രൂപ്പ് എയിൽ നടന്ന പോരാട്ടത്തിൽ കേരള ബ്ലാസ്റ്റേഴ്സ് റിസേർവ്സിനെയാണ് എസ് ബി ഐ സമനിലയിൽ പിടിച്ചത്. എസ് ബി ഐയുടെ ഹോമായ തിരുവനന്തപുരം ചന്ദ്രശേഖരൻ നായർ സ്റ്റേഡിയത്തിൽ നടന്ന മത്സരം ഗോൾ രഹിത സമനിലയിലാണ് അവസാനിച്ചത്. എസ് ബി ഐയുടെ തുടർച്ചയായ മൂന്നാം സമനിലയാണിത്. ലീഗിൽ ഇതുവരെ ഒരു ജയം പോലും സ്വന്തമാക്കാൻ എസ് ബി ഐക്ക് ആയിട്ടില്ല.

കഴിഞ്ഞ കളിയിൽ എഫ് സി കൊച്ചിയെ തോൽപ്പിച്ച വീറ് കാണിക്കാൻ ഇന്ന് കേരള ബ്ലാസ്റ്റേഴ്സിനും ആയില്ല. മൂന്ന് മത്സരങ്ങൾ കഴിഞ്ഞപ്പോൾ നാലു പോയന്റാണ് കേരള ബ്ലാസ്റ്റേഴ്സിന് ഇപ്പോൾ ഉള്ളത്. നാലു മത്സരങ്ങൾ കളിച്ച എസ് ബി ഐക്ക് മൂന്ന് പോയന്റും ഉണ്ട്.

കേരള പ്രീമിയർ ലീഗിൽ ഇന്ന് രണ്ട് മത്സരങ്ങളാണ് ഉള്ളത്. ഗ്രൂപ്പ് എയിൽ നടക്കുന്ന മത്സരത്തിൽ കേരള ബ്ലാസ്റ്റേഴ്സ് ഇന്ന് എസ് ബി ഐയെ നേരിടും. എസ് ബി ഐയുടെ ഹോം ഗ്രൗണ്ടായ തിരുവനന്തപുരം ചന്ദ്രശേഖരൻ നായർ സ്റ്റേഡിയത്തിലാണ് മത്സരം നടക്കുന്നത്. കഴിഞ്ഞ മത്സരത്തിൽ എഫ് സി കൊച്ചിയെ തോൽപ്പിച്ച് ഫോമിലേക്ക് തിരികെ എത്തിയ കേരള ബ്ലാസ്റ്റേഴ്സ് റിസേർവ്സ് ടീം ആ ഫോം തുടരുക ആകും ഇന്ന് ലക്ഷ്യം ഇടുന്നത്. യുവതാരം അഫ്ദാലിന്റെ ഫോമിലാകും കേരള ബ്ലാസ്റ്റേഴ്സിന്റെ പ്രതീക്ഷ. അഫ്ദാദ് എഫ് സി കൊച്ചിക്കെതിരെ ഇരട്ട ഗോളുകൾ നേടിയിരുന്നു.

രണ്ട് മത്സരങ്ങളിൽ നിന്ന് ഒരു ജയവും ഒരു തോൽവിയുമാണ് കേരള ബ്ലാസ്റ്റേഴ്സിന് ഉള്ളത്. എതിരാളികളായ എസ് ബി ഐ ലീഗിൽ ഇതുവരെ ജയം സ്വന്തമാക്കിയില്ല. മൂന്ന് മത്സരങ്ങൾ കഴിഞ്ഞപ്പോൾ ഒരു പരാജയവും രണ്ട് സമനിലയുമാണ് ടീമിന്റെ സമ്പാദ്യം. ഇന്ന് ആദ്യ ജയം നേടാൻ കഴിയും എന്നാകും എസ് ബി ഐയുടെ പ്രതീക്ഷ.

ഗ്രൂപ്പ് എയിൽ ഇന്ന് നടക്കുന്ന മറ്റൊരു മത്സരത്തിൽ സാറ്റ് തിരൂർ എഫ് സി തൃശ്ശൂരിനെ നേരിടും. തിരൂരിൽ വെച്ചാകും മത്സരം നടക്കുക. രണ്ട് മത്സരങ്ങളിൽ നിന്ന് ഒരു ജയവും ഒരു സമനിലയുമായി നല്ല തുടക്കമാണ് സാറ്റിന് ലീഗിൽ ലഭിച്ചിരിക്കുന്നത്. മറുവശത്തുള്ള എഫ് സി തൃശ്ശൂരിന് ഇത് ലീഗിലെ ആദ്യ മത്സരമാണ്. രണ്ട് മത്സരങ്ങളും വൈകിട്ട് 3.30നാണ് ആരംഭിക്കുക.