കേരള പ്രീമിയർ ലീഗിൽ ഇന്ന് നടന്ന നിർണായക ഗ്രൂപ്പ് ഘട്ട മത്സരത്തിൽ മുത്തൂറ്റ് എഫ് എക്ക് പരാജയം. ഇന്ന് വിജയിച്ചാൽ മുത്തൂറ്റിന് സെമി ഉറപ്പിക്കാമായിരുന്നു. ഡോൺ ബോസ്കോയെ നേരിട്ട മുത്തൂറ്റ് എഫ് എ ഒന്നിനെതിരെ മൂന്ന് ഗോളുകളുടെ പരാജയം ഏറ്റുവാങ്ങി. ഇതോടെ മുത്തൂറ്റിന്റെ സെമി പ്രതീക്ഷ അവസാനിച്ചു.
ഇന്ന് 26ആം മിനുട്ടിൽ മുഹമ്മദ് റോഷനിലൂടെ ഡോൺ ബോസ്കോ ആണ് ലീഡ് എടുത്തത്. 46ആം മിനിട്ടിൽ വെസ്ലിയിലൂടെ മുത്തൂറ്റ് സമനില നേടിക്കൊണ്ട് പ്രതീക്ഷ നിലനിർത്തി. പിന്നീട് 75ആം മിനുട്ടിലും 79ആം മിനുട്ടിൽ ജോർജ്ജ് ഫോർബിയയിലൂടെ ഇരട്ട ഗോളുകൾ നേടിക്കൊണ്ട് ഡോൺ ബോസ്കോ വിജയം ഉറപ്പിച്ചു.
ഗ്രൂപ്പ് ഘട്ടത്തിലെ മുത്തൂറ്റിന്റെ മുഴുവൻ മത്സരങ്ങളും കഴിഞ്ഞപ്പോൾ അവർ 10 മത്സരങ്ങളിൽ നിന്ന് 21 പോയിന്റുമായി മൂന്നാമത് നിൽക്കുകയാണ്. ആദ്യ രണ്ട് സ്ഥാനക്കാർക്ക് മാത്രമേ സെമി ഫൈനലിലേക്ക് മുന്നേറുകയുള്ളൂ. ഇപ്പോൾ കെ എസ് ഇ ബിയും കേരള യുണൈറ്റഡും ആണ് ഗ്രൂപ്പ് ബിയിൽ ആദ്യ രണ്ട് സ്ഥാനങ്ങളിൽ ഉള്ളത്. മുത്തൂറ്റ് പരാജയപ്പെട്ടതോടെ കെ എസ് ഇ ബി സെമി ഫൈനൽ ഉറപ്പിച്ചു. കേരള യുണൈറ്റഡ് സെമിയിൽ കടക്കുമോ എന്നത് ഗോൾഡൻ ത്രഡ്സിന്റെ അവസാന മത്സരത്തിനു ശേഷമേ തീരുമാനം ആവുകയുള്ളൂ
