സന്തോഷ് ട്രോഫി ഫൈനൽ റൗണ്ടിൽ ഒഡീഷയിൽ വെച്ച് നടന്ന ആദ്യ മത്സരത്തിൽ നിലവിലെ ചാമ്പ്യന്മാരായ കേരളത്തിന് വിജയം. കേരളം ഇന്ന് ഗോവയെ ആണ് നേരിട്ടത്. ഇഞ്ചോടിഞ്ച് പോരാട്ടം നടന്ന മത്സരത്തിൽ ഒരു ഇഞ്ച്വറി ടൈം ഗോളിന്റെ ബലത്തിൽ 3-2ന് ജയിച്ചാണ് കേരളം മൂന്ന് പോയിന്റ് സ്വന്തമാക്കിയത്.
25-ാം മിനിറ്റിൽ പെനാൽറ്റിയിലൂടെ നിജോ ഗിൽബേർട്ട് ആണ് കേരളത്തിന് ലീഡ് സമ്മാനിച്ചത്. പിന്നാലെ 57-ാം മിനിറ്റിൽ റിസ്വാൻ അലിയുടെ ഗോൾ കേരളത്തിന്റെ ലീഡ് 2-0 ആക്കി ഉയർത്തി. ഇവിടെ നിന്നാണ് ഗോവ തിരിച്ചടിച്ചത്. അവർ തുടരെ തുടരെ ഗോൾ നേടിയപ്പോൾ കളി 2-0ൽ നിന്ന് 2-2 എന്നായി.
എങ്കിലും കേരള പൊരുതൽ തുടർന്നു. 91-ാം മിനിറ്റിൽ ആസിഫിന്റെ ഗോളിൽ വിജയം ഉറപ്പിക്കുകയും ചെയ്തു. കേരളത്തിന്റെ അടുത്ത മത്സരം ഫെബ്രുവരി 12ന് കർണാടകയുമായാണ്.