ഒരൊറ്റ ലക്ഷ്യം പ്ലേ ഓഫ്, മുംബൈ ഇന്ന് എടികെയെ നേരിടും

ഇന്ത്യൻ സൂപ്പർ ലീഗിൽ മുംബൈ സിറ്റി എഫ്‌സി എടികെയെ നേരിടും. ഇന്നത്തെ മത്സരത്തിൽ ജയിച്ച് വിലയേറിയ മൂന്നു പോയന്റ് നേടാനാകും മുംബൈയുടെ ലക്ഷ്യം. ഇന്നത്തെ ജയം മുംബൈയെ നോർത്ത് ഈസ്റ്റിനു മുകളിൽ മൂന്നാം സ്ഥാനത്തെത്തിക്കും . കൊൽക്കത്തയിൽ വെച്ച് നടക്കുന്ന പോരാട്ടത്തെ ആവേശകരമാക്കുന്നത് ഇതൊക്കെയാണ്, ഇന്ത്യൻ സമയം 7.30pm ആണ് കിക്കോഫ്.

കൊപ്പൽ ആശാന്റെ എടികെ ഈ സീസണിന്റെ തുടക്കത്തിൽ കിതച്ചെങ്കിലും ജനുവരി മുതൽ മികച്ച പ്രകടനമാണ് കാഴ്ച വെക്കുന്നത്. സൂപ്പർ താരം എടു ഗാർസിയയുടെ വരവോടു കൂടി എടികെ ശക്തരായി. ജെംഷെഡ്പൂരിനെതിരെ മികച്ച പ്രകടനമാണ് എ ടികെ പുറത്തെടുത്തത്. എന്നാൽ ഗോവയോടും പൂനെയോടും പോയന്റ് നഷ്ടപ്പെടുത്തിയത് തിരിച്ചടിയായി. എതിരാളികൾക്കെല്ലാം പിഴച്ചാൽ നാളത്തെ ജയം എ ടികെയെ സാധ്യതകൾ കുറവാണെങ്കിലും ടോപ്പ് ഫോറിലെത്തിക്കും.

ഇന്ത്യൻ സൂപ്പർ ലീഗിൽ ഇരു ടീമുകളും ഏറ്റുമുട്ടിയപ്പോൾ നാല് തവണ വീതം ജയിച്ചു. ഈ സീസണിൽ തുടക്കത്തിൽ മികച്ച പ്രകടനമാണ് മുംബൈ കാഴ്ച വെച്ചത്. എന്നാൽ പിന്നീട് കാലിടറിയ മുംബൈ ടോപ്പ് ഫോറിലെത്താനുള്ള വസരം നഷ്ടപ്പെടുത്തി. രണ്ടു തവണ ചാമ്പ്യന്മാരായ എടികെയെ ഇന്ന് പരാജയപ്പെടുത്തിയാൽ ഇതുവരെ നഷ്ടപ്പെടുത്തിയതെല്ലാം തിരിച്ച് പിടിക്കാം. ഈ സീസണിൽ ഇതിനുമുൻപ് ഇരു ടീമുകളും ഏറ്റുമുട്ടിയപ്പോൾ സമനിലയായിരുന്നു ഫലം.