തുടർ തോൽവികൾക്ക് ശേഷം ഒഡീഷയെ എതിരില്ലാത്ത മൂന്ന് ഗോളിന് വീഴ്ത്തി എഫ് സി ഗോവ വീണ്ടും വിജയവഴിയിൽ. സ്വന്തം തട്ടകത്തിൽ നടന്ന മത്സരത്തിൽ ബ്രിസൻ ഫെർണാണ്ടസ്, നോവ സദോയി, അൽവരോ വാസ്ക്വസ് എന്നിവരാണ് ഗോൾ വല കുലുക്കിയത്. രണ്ടു അസിസ്റ്റും ഒരു ഗോളുമായി സദോയി ആണ് ഗോവയുടെ വിജയത്തിൽ നിർണായകമായത്. ഇതോടെ ഗോവ പതിനഞ്ചു പോയിന്റുമായി അഞ്ചാമത് എത്തി. ഒഡീഷ പതിനെട്ട് പോയിന്റുമായി നാലമതാണ്.
ഗോൾ രഹിതമായിരുന്നു മത്സരത്തിന്റെ ആദ്യ പകുതി. അറുപത്തിയഞ്ചാം മിനിറ്റിൽ നന്ദ കുമാർ ചുവപ്പ് കണ്ടു പുറത്തായത് ഒഡീഷയുടെ ആളെണ്ണത്തെ ബാധിച്ചു. ഇതു മുതലെടുത്തു അക്രമണം കനപ്പിച്ച ഗോവക്ക് എഴുപതിനാലാം മിനിറ്റിൽ ആദ്യ ഗോൾ കണ്ടെത്താൻ ആയി. സാദോയിയുടെ വ്യക്തിഗത മികവിൽ എത്തിയ ബോൾ കൃത്യമായ റണ്ണോടെ ബ്രിസൻ ഫെർണാണ്ടസ് വലയിലേക്ക് തള്ളി വിട്ടു.
നാല് മിനിറ്റിനു ശേഷം ഗോവ ലീഡ് വർധിപ്പിച്ചു. കളം നിറഞ്ഞു കളിച്ചു ആദ്യ ഗോളിന് വഴിയൊരുക്കിയ സദോയിയാണ് ഇത്തവണ വല കുലുക്കിയത്. തൊണ്ണൂറാം മിനിറ്റിൽ ഒരിക്കൽ കൂടി വല കുലുക്കാൻ സദോയിക്ക് അവസരം ലഭിച്ചെങ്കിലും താരം അൽവരോ വാസ്ക്വസിന് പന്ത് കൈമാറി. താരം അനായാസം തന്റെ ആദ്യ ഗോൾ കണ്ടെത്തി.