ഹബാസിനെ പുറത്താക്കി ഫെറാണ്ടോയെ ടീമിൽ എത്തിച്ച മോഹൻ ബഗാന് വിജയം. പുതിയ പരിശീലകൻ ചുമതല ഏറ്റെടുത്ത ആദ്യ മത്സരത്തിൽ നോർത്ത് ഈസ്റ്റിനെ രണ്ടിനെതിരെ മൂന്നു ഗോളുകൾക്കാണ് മോഹൻ ബഗാൻ തോൽപ്പിച്ചത്. തുടക്കത്തിൽ തന്നെ ഒരു ഗോളിന് പിറകിൽ പോയ ശേഷമായിരുന്നു ബഗാന്റെ തിരിച്ചടി. മത്സരത്തിന്റെ രണ്ടാം മിനുട്ടിൽ മലയാളി താരം സുഹൈറിന്റെ ഹെഡറിലൂടെ ആണ് നോർത്ത് ഈസ്റ്റ് മുന്നിൽ എത്തിയത്. സുഹൈറിന്റെ ഈ സീസണിലെ മൂന്നാം ഗോളായിരുന്നു ഇത്.
ഈ ഗോളിന് ആദ്യ പകുതിയുടെ അവസാന നിമിഷങ്ങളിലാണ് മോഹൻ ബഗാൻ മറുപടി നൽകിയത്. റോയ് കൃഷ്ണയുടെ ക്രോസിൽ നിന്ന് ലിസ്റ്റൺ കൊളാസോ ആണ് ബഗാന്റെ സമനില ഗോൾ നേടിയത്. രണ്ടാം പകുതിയിൽ കളി ബഗാൻ ആണ് നിയന്ത്രിച്ചത്. 53ആം മിനുട്ടിൽ ഹ്യൂഗോ ബൗമസിലൂടെ മോഹൻ ബഗാൻ മുന്നിൽ എത്തി. 76ആം മിനുട്ടിൽ ബൗമസ് തന്നെ വീണ്ടും ഗോൾ നേടിയതോടെ കളിയിൽ മോഹൻ ബഗാൻ 3-1ന് മുന്നിൽ എത്തി. 88ആം മിനുട്ടിൽ സബ്ബായി എത്തിയ മഷൂർ ഷെരീഫിന്റെ ഗോൾ നോർത്ത് ഈസ്റ്റ് സ്കോർ 3-2 എന്നാക്കി. ഇത് അവസാന നിമിഷങ്ങളിൽ കളി ആവേശകരമാക്കി. എങ്കിലും അവസാനം ബഗാൻ ജയം സ്വന്തമാക്കി.
വിജയമില്ലാത്ത നാലു മത്സരങ്ങൾക്ക് ശേഷമാണ് മോഹൻ ബഗാൻ വിജയിക്കുന്നത്. ഈ ജയത്തോടെ അവർ 11 പോയിന്റുമായി ലീഗിൽ നാലാം സ്ഥാനത്ത് എത്തി.
