സീസൺ അവസാനത്തിലേക്കായി ഒരു പുതിയ സൈനിംഗ് പൂർത്തിയാക്കി മുംബൈ സിറ്റി എഫ്സി. സ്ലോവാക്യൻ ആക്രമണകാരി യാക്കൂബ് വോജ്റ്റൂസ് ആണ് മുംബൈ സിറ്റിയിൽ എത്തിയിരിക്കുന്നത്. 9-ാം നമ്പർ ജേഴ്സി ആകും താരം അണിയുക. കാൽമുട്ടിനേറ്റ പരിക്കിനെത്തുടർന്ന് സീസണിൽ പുറത്തായ സ്പാനിഷ് താരം ഇക്കർ ഗുരോത്ക്സേനയ്ക്ക് പകരക്കാരനായാണ് യാക്കൂബ് എത്തുന്നത്.
ഇറ്റാലിയൻ ക്ലബുകളായ ഇൻ്റർ മിലാൻ്റെയും ചീവോയുടെയും ജേഴ്സി അണിഞ്ഞിട്ടുള്ള താരമാണ്. എംഎസ്കെ സിലിനയിലൂടെ ആണ് തൻ്റെ കരിയർ ആരംഭിച്ചത്. മുംബൈ സിറ്റി എഫ്സിയുടെ പുതിയ നമ്പർ 9 മുമ്പ് പോളണ്ടിലെയും റൊമാനിയയിലെയും വിവിധ ക്ലബ്ബുകൾക്കായും കളിച്ചിട്ടുണ്ട്. 2009/10 ൽ സ്ലൊവാക്യൻ ചാമ്പ്യൻഷിപ്പ് നേടിയപ്പോൾ എംഎസ്കെ സിലിനയുടെ ഭാഗമായിരുന്നു.
നിലവിൽ, ഐഎസ്എൽ ലീഗ് വിന്നേഴ്സ് ഷീൽഡിൻ്റെ ഉടമകളായ മുംബൈ സിറ്റി പോയിൻ്റ് പട്ടികയിൽ ഒന്നാമതാണ് നിൽക്കുന്നത്. മൂന്ന് മത്സരങ്ങൾ മാത്രമെ അവർക്ക് ലീഗ് ഘട്ടത്തിൽ ശേഷിക്കുന്നുള്ളൂ.