ഉത്തേജക മരുന്ന് പരിശോധനയിൽ അനുവാദമില്ലാത്ത മരുന്നുകൾ ഉപയോഗിച്ചതായി തെളിഞ്ഞതിനാൽ ഡെൽഹി ഡൈനാമോസ് താരം റാണ ഗരാമി പ്രതിക്കൂട്ടിൽ. താരത്തിനെ കടുത്ത നടപടി തന്നെ ഉടൻ ഉണ്ടാകും എന്നാണ് റിപ്പോർട്ട്. നാലു വർഷത്തോളം താരത്തെ വിലക്കാനാണ് എ ഐ എഫ് എഫ് ആലോചിക്കുന്നത്. നാഷണൽ ആന്റി ഡോപിംഗ് ഏജൻസി നടത്തിയ പരിശോധനയിലാണ് റാണ ഗരാമി ചില ഉത്തേജക മരുന്നുകൾ ഉപയോഗിച്ചതായി തെളിഞ്ഞത്.
എന്നാൽ ഈ സംഭവത്തിൽ ക്ലബിന് യാതൊരു പങ്കുമില്ല എന്ന് ഡെൽഹി ഡൈനാമോസ് അറിയിച്ചു. റാണയ്ക്ക് നിയമ സഹായങ്ങൾ നൽകും എങ്കിലും അതിന് റാണയ്ക്ക് ഈ മരുന്നുകൾ നൽകിയത് ക്ലബാണെന്ന് അർത്ഥമില്ല എന്ന് ക്ലബ് പറഞ്ഞു. ഉത്തേജക മരുന്നുകൾ ഉപയോഗിക്കുന്നത് ക്ലബ് ഒരിക്കലും അംഗീകരിക്കില്ല എന്നും ഡെൽഹി ഡൈനാമോസ് വിശദീകരിച്ചു. നാലു വർഷത്തോളം വിലക്ക് വരുക ആണെങ്കിൽ അത് താരത്തിന്റെ കരിയറിന്റെ അവസാനമായി കണക്കാക്കേണ്ടി വരും. ഈ കഴിഞ്ഞ സീസണിൽ ഡെൽഹിക്കായി മികച്ച പ്രകടനം കാഴ്ചവെക്കാൻ റാണയ്ക്കായിരുന്നു.