Category: Internationals

ബെൽജിയം ദേശീയ ടീമിന് വേണ്ടി 100 മത്സരങ്ങൾ പൂർത്തിയാക്കിയ സൂപ്പർ താരം ഏദൻ ഹസാർഡിന് ബെൽജിയൻ ഫുട്ബോൾ അസോസിയേഷന്റെ ആദരം. ഇന്നലെ കസാഖിസ്ഥാനെതിരായ മത്സരത്തിന് മുൻപാണ് 100 മത്സരങ്ങൾ പൂർത്തിയാക്കി ഹസാർഡിനെ ബെൽജിയൻ ഫുട്ബോൾ അസോസിയേഷൻ ആദരിച്ചത്. കഴിഞ്ഞ മാർച്ചിൽ സൈപ്രസിനെതിരെയാണ് ഹസാർഡ് 100 മത്തെ മത്സരം ദേശീയ ടീമിനായി കളിച്ചത്.

തന്റെ 17മത്തെ വയസ്സിലാണ് ഹസാർഡ് ആദ്യമായി ദേശീയ ടീമിന്റെ കുപ്പായമണിഞ്ഞത്. ബെൽജിയൻ ടീമിന്റെ ക്യാപ്റ്റൻ കൂടിയായ ഹസാർഡ് അവർക്ക് വേണ്ടി 30 ഗോളുകളും നേടിയിട്ടുണ്ട്. ഇന്നലെ നടന്ന യൂറോ യോഗ്യത മത്സരത്തിൽ ബെൽജിയം ഏകപക്ഷീയമായ മൂന്ന് ഗോളുകളക്ക് കസാഖിസ്ഥാനെ തോല്പിച്ചിരുന്നു.  കഴിഞ്ഞ ദിവസമാണ് റെക്കോർഡ് തുകക്ക് ഹസാർഡ് ചെൽസി വിട്ട് സ്പാനിഷ് ടീമായ റയൽ മാഡ്രിഡിൽ എത്തിയത്.

കോപ്പ അമേരിക്കയ്ക്ക് മുന്നോടിയായുള്ള സൗഹൃദ മത്സരത്തിൽ ബ്രസീലിന് ജയം. കോപ്പയിലെ ഗസ്റ്റ് ടീമായാ ഖത്തറിനെതിരെയാണ് ഇന്ന് ബ്രസീൽ ജയിച്ചത്. എതിരില്ലാത്ത രണ്ടു ഗോളുകൾക്കായിരുന്നു ടിറ്റെയുടെ ബ്രസീലിയൻ ടീം ഇന്ന് ജയിച്ചത്. മത്സരത്തിന്റെ 16 ആം മിനുട്ടിൽ റിച്ചാളിസണ്ണും 24 ആം മിനുട്ടിൽ ഗബ്രിയേൽ ജീസൂസും ഗോളടിച്ചു.

അതേ സമയം മത്സരത്തിന്റെ തുടക്കത്തിൽ തന്നെ സൂപ്പർ താരം നെയ്മർ പരിക്കേറ്റ് പുറത്ത് പോയത് ബ്രസീലിന് തിരിച്ചടിയായി. പരിക്കുമായി മല്ലിടുന്ന നെയ്മറിന്റെ അഭാവം കോപ്പയിൽ ബ്രസീലിന് തിരിച്ചടിയായേക്കും. ഇന്നത്തെ അനായാസ ജയം കോപ്പയ്ക്കായുള്ള ബ്രസീലിയൻ ടീമിന്റെ ആത്മവിശ്വാസം വർദ്ധിപ്പിക്കും.

യൂറോ 2020 യോഗ്യതാ മത്സരങ്ങൾക്ക് മുന്നോടിയായി നടന്ന സൗഹൃദ മത്സരത്തിൽ ഫ്രാൻസിന് ജയം. എതിരില്ലാത്ത രണ്ട് ഗോളുകൾക്കായിരുന്നു ലോകചാമ്പ്യന്മാരായ ഫ്രാൻസ് ബൊളീവിയയെ പരാജയപ്പെടുത്തിയത്. ഫ്രാൻസിന് വേണ്ടി അത്ലെറ്റിക്കോ മാഡ്രിഡ് താരം ഗ്രീസ്മാനും തോമസ് ലെമാറും ഗോളടിച്ചു.

മത്സരം തുടങ്ങി അഞ്ചുമിനുറ്റിൽ തന്നെ ഫ്രാൻസിന് ലീഡ് നൽകാൻ തോമസ് ലെമാറിനായി. ആദ്യ പകുതി അവസാനിക്കും മുൻപ് തന്നെ ഗ്രീസ്മാനിലൂടെ ഫ്രാൻസ് വിജയമുറപ്പിച്ചു. രണ്ടാം പകുതിയിൽ സൂപ്പർ താരം എമ്പപ്പെക്ക് പരിക്കേറ്റത് ഫ്രാൻസ് ക്യാമ്പിൽ ആശങ്കകൾ ഉയർത്തിയിട്ടുണ്ട്. ദിദിയെർ ദെശ്ചാമ്പ്സിന്റെ ഫ്രാൻസ് യൂറോ യോഗ്യത റൗണ്ടിലെ ഗ്രൂപ്പ് H ലെ മത്സരത്തിൽ തുർക്കിയെ ആണ് നേരിടുക. ഇരു രാജ്യങ്ങൾക്കും ആറ് പോയന്റുകൾ വീതമുണ്ട്.

ചൈനയുടെ പരിശീലകനായിരുന്ന ക്യാപ്റ്റൻ ഫാബിയോ കന്നവാരോ പരിശീലക സ്ഥാനത്ത് നിന്ന് ഒഴിഞ്ഞു. വെറും രണ്ടു മത്സരം പരിശീലിപ്പിച്ചതിനു ശേഷമാണു കന്നവാരോ പരിശീലക സ്ഥാനത്ത് നിന്ന് ഒഴിയുന്നത്. കന്നവാരോക്ക് കീഴിൽ കളിച്ച രണ്ടു മത്സരങ്ങളിലും ചൈന പരാജയപ്പെട്ടിരുന്നു. സ്വന്തം ഗ്രൗണ്ടിൽ തായ്ലൻഡിനോടും ഉസ്‌ബെക്കിസ്ഥാനോടുമാണ് ചൈന പരാജയപ്പെട്ടത്. ഇറ്റലിക്ക് ലോകകപ്പ് കിരീടം നേടി കൊടുത്ത ക്യാപ്റ്റനാണ് കന്നവാരോ.

കഴിഞ്ഞ ജനുവരിയിലാണ് ഏഷ്യൻ കപ്പിലെ പരാജയത്തെ തുടർന്ന് പരിശീലകനായിരുന്ന മാഴ്‌സെലോ ലിപ്പി രാജി വെച്ചത്. തുടർന്നാണ് ചൈനീസ് സൂപ്പർ ലീഗിൽ ഗുവാൻസോ എവർഗ്രാൻഡെയുടെ പരിശീലകനായിരുന്ന കന്നവാരോ ചൈനയുടെ പരിശീലക സ്ഥാനം കൂടി ഏറ്റെടുത്തത്. രണ്ടു പരിശീലക ജോലി കൂടി ഒരുമിച്ച് കൊണ്ടുപോവാനുള്ള ബുദ്ധിമുട്ടുകൊണ്ടാണ് ചൈനയുടെ പരിശീലക വേഷം ഒഴിയുന്നതെന്ന് കന്നവാരോ വ്യക്തമാക്കി. അതെ സമയം കഴിഞ്ഞ ജനുവരിയിൽ ടീം വിട്ട ലിപ്പി വീണ്ടും ചൈനയുടെ പരിശീലകനാവാൻ സാധ്യതയുണ്ടെന്നും റിപോർട്ടുകൾ ഉണ്ട്.

മുൻ ജംഷെഡ്പൂർ എഫ് സി താരവും ഓസ്‌ട്രേലിയയുടെ എക്കാലത്തേയും മികച്ച ഗോൾ സ്കോററുമായ ടിം കാഹിൽ ക്ലബ്ബ് കരിയറിനോട് വിട പറഞ്ഞു. ഓസ്‌ട്രേലിയൻ മാധ്യമത്തിന് നൽകിയ അഭിമുഖത്തിലാണ് താരം ഫുട്‌ബോൾ അവസാനിപ്പിക്കാനുള്ള തീരുമാനം പ്രഖ്യാപിച്ചത്. ഇനിയുള്ള കാലം ഫുട്‌ബോൾ പരിശീലകനാവുക എന്ന കാര്യവും താരം വ്യക്തമാക്കി.

39 വയസ്സുകാരനായ താരം 2018 ലോകകപ്പോടെയാണ് ദേശീയ ടീമിൽ നിന്ന് വിരമിച്ചത്‌. ഇന്ത്യയിൽ മികച്ച 6 മാസങ്ങൾ കളിക്കാൻ ആയെങ്കിലും ഇനി പ്രായം കാരണം കളിക്കാനാവില്ല. കുടുംബത്തോടൊപ്പം സമയം ചിലവഴിക്കാൻ ആഗ്രഹമുണ്ട് എന്ന് വ്യക്തമാക്കിയ താരം ഇംഗ്ലണ്ടിൽ എവർട്ടൻ, മിൽവാൾ ടീമുകൾക്ക് വേണ്ടിയും കളിച്ചു. ഇംഗ്ലണ്ടിന് പുറമെ അമേരിക്ക, ചൈന തുടങ്ങിയ രാജ്യങ്ങളിലെ ക്ലബ്ബ്ൾക്ക് വേണ്ടിയും കളിച്ച താരം ഓസ്‌ട്രേലിയക്ക് വേണ്ടി 50 രാജ്യാന്തര ഗോളുകൾ നേടിയിട്ടുണ്ട്

ചൈനയിൽ നടക്കുന്ന ചൈന കപ്പ് ഫുട്ബോൾ ടൂർണമെന്റിൽ ആതിഥേയരെ ഞെട്ടിച്ച് തായ്ലാന്റ്. ഇന്ന് നടന്ന സെമി ഫൈനലിൽ ചൈനയെ എതിരില്ലാത്ത ഒരു ഗോളിനാണ് തായ്‌ലാന്റ് പരാജയപ്പെടുത്തിയത്. ചനാതിപ് സോങ്ക്രാസിൻ ആണ് തായ്ലാന്റിനായൊ വിജയ ഗോൾ നേടിയത്. ഏഷ്യാ കപ്പിൽ ഉൾപ്പെടെ അടുത്ത കാലത്തായുള്ള ചൈനയുടെ മോശം ഫോമിന്റെ പ്രതിഫലനമായി ഇന്നത്തെ മത്സരം.

ഇന്ന് വിജയിച്ച തായ്ലാന്റിന് ഫൈനൽ ഉറുഗ്വേയോ ഉസ്ബെക്കിസ്ഥാനോ ആകും എതിരാളികൾ. ഇരു ടീമുകളും ആണ് രണ്ടാം സെമിയിൽ ഏറ്റുമുട്ടുന്നത്.

ലയണൽ മെസ്സിയുടെ അർജന്റീന ജേഴ്സിയിലെ മടങ്ങി വരവ് ഈ മാസം ഉണ്ടാകും എന്ന് ഉറപ്പായി. മാർച്ചിലെ ഇന്റർനാഷണൽ ബ്രേക്കിനായി അർജന്റീന പ്രഖ്യാപിക്കുന്ന ടീമിൽ ലയണൽ മെസ്സിയും ഉണ്ടാകും എന്ന് അർജ്നറ്റീന പരിശീലകൻ സ്കലോനി അറിയിച്ചു. ലോകകപ്പ് മുതൽ ഇങ്ങോട്ട് അർജന്റീനയ്ക്ക് വേണ്ടി കളിക്കാതിരുന്ന മെസ്സി സൗഹൃദ മത്സരത്തിലൂടെ ആകും തിരിച്ചുവരിക. വെനിസ്വേലയും മൊറോക്കോയും ആണ് അർജന്റീനയുടെ മാർച്ചിലെ എതിരാളികൾ.

ഈ സീസൺ അവസാനം കോപ അമേരിക്ക ഉള്ളത് കൊണ്ടാണ് മെസ്സി തിരിച്ചെത്തുന്നത്. കോപയിൽ കളിക്കും മുമ്പ് ടീമുമായി ഇണങ്ങാൻ ഇത് സഹായിക്കും എന്ന് മെസ്സി കരുതുന്നു. അർജന്റീനയുടെ സ്ക്വാഡ് ഈ ആഴ്ച തന്നെ പ്രഖ്യാപിക്കും. രണ്ട് സൗഹൃദ മത്സരങ്ങളിൽ ആദ്യത്തെ മത്സരത്തിൽ മാത്രമെ മെസ്സി കളിക്കാൻ സാധ്യതയുള്ളൂ.