കേരള ബ്ലാസ്റ്റേഴ്‌സ് വിട്ടു മറ്റൊരു ക്ലബ്ബിലേക്ക് പോവാൻ തനിക്ക് താല്പര്യമുണ്ടായിരുന്നില്ലെന്ന് മുൻ കേരള ബ്ലാസ്റ്റേഴ്‌സ് പരിശീലകനും ഇപ്പോൾ എ.ടി.കെയുടെ പരിശീലകനുമായ സ്റ്റീവ് കോപ്പൽ. ഞാൻ കേരള ബ്ലാസ്റ്റേഴ്‌സ് വിട്ടു പോവണമെന്നത് മറ്റു പലരുടെയും തീരുമാനം ആയിരുന്നെന്നും സ്റ്റീവ് കോപ്പൽ പറഞ്ഞു. ഐ.എസ്.എൽ സീസൺ തുടങ്ങനിരിക്കെയാണ് കോപ്പലിന്റെ പ്രതികരണം.
കേരള ബ്ലാസ്റ്റേഴ്‌സ് ആരാധകരുടെ പ്രിയ പരിശീലകനായ കോപ്പൽ കഴിഞ്ഞ സീസണിൽ കേരള ബ്ലാസ്റ്റേഴ്സിൽ തിരിച്ചെത്തുമെന്നായിരുന്നു ആരാധകരുടെ പ്രതീക്ഷ. എന്നാൽ പ്രതീക്ഷക്ക് വിപരീതമായി റെനെ മുളൻസ്റ്റീൻ കേരള ബ്ലാസ്റ്റേഴ്സിന്റെ പരിശീലകനാവുകയായിരുന്നു. സീസണിന്റെ മധ്യത്തോടെ റെനെ കേരള ബ്ലാസ്റ്റേഴ്‌സ് വിട്ടു പോവുകയും ചെയ്തു. തുടർന്നാണ് താൽകാലിക പരിശീലകനായി ഡേവിഡ് ജെയിംസ് എത്തുന്നതും ഈ സീസണിലും പരിശീലകനായി ജെയിംസ് എത്തുന്നതും.
കോപ്പലിന്റെ കീഴിൽ ഐ.എസ്.എൽ ഫൈനലിൽ എത്തിയ കേരള ബ്ലാസ്റ്റേഴ്‌സ് എ.ടി.കെയോട് പരാജയപ്പെടുകയായിരുന്നു. ഈ കൊല്ലാത്തെ ഐ.എസ്.എൽ സീസണിൽ എ.ടി.കെയും കേരള ബ്ലാസ്റ്റേഴ്സും തമ്മിലാണ് ആദ്യ മത്സരം.
ജാംഷഡ്‌പൂർ എഫ് സി ആയിരിക്കും തന്റെ ഇന്ത്യയിൽ അവസാന പരിശീലക വേഷം എന്നാണ് ആഗ്രഹിച്ചതെങ്കിലും കൊൽക്കത്ത എന്ന നഗരത്തിന്റെ ചരിത്രം തന്നെ എ.ടി.കെയുടെ പരിശീലക വേഷം ഏറ്റെടുക്കാൻ പ്രേരിപ്പിച്ചെന്നും കോപ്പൽ പറഞ്ഞു.
