സാഫ് ഫുട്ബോളിൽ ഇന്ത്യക്ക് വിജയ തുടക്കം. ആഷിഖ് കുരുണിയന്റെ ഇന്ത്യക്ക് വേണ്ടിയുള്ള ആദ്യ ഗോൾ കണ്ട മത്സരത്തിൽ ഇന്ത്യ ഏകപക്ഷീയമായ രണ്ടു ഗോളുകൾക്ക് ശ്രീലങ്കയെ തോൽപ്പിച്ചു. ഇരു പകുതികളിലുമായി നേടിയ ഗോളുകളാണ് ഇന്ത്യയുടെ ജയം ഉറപ്പാക്കിയത്.
ഇന്ത്യയുടെ നിയന്ത്രണം കണ്ട മത്സരത്തിന്റെ ആദ്യ മിനിറ്റ് മുതൽ ആഷിഖ് കുരുണിയൻ ശ്രീലങ്കൻ ഗോൾ മുഖം ലക്ഷ്യമാക്കി കുതിച്ചു. അതിന്റെ പ്രതിഫലമെന്നോണം 36ആം മിനുട്ടിൽ ആഷിഖ് വല കുലുക്കി. മികച്ചൊരു മുന്നേറ്റത്തിനൊടുവിൽ ശ്രീലങ്കൻ ഗോളിക്ക് ഒരു അവസരവും നൽകാതെ ആഷിഖ് വല കുലുക്കുകയായിരുന്നു
തുടർന്ന് രണ്ടാം പകുതിയുടെ തുടക്കത്തിൽ തന്നെ ഇന്ത്യ ലീഡ് ഇരട്ടിയാക്കി. ചാങ്ദേയാണ് ഗോൾ നേടിയത്. തുടർന്നും ഗോൾ നേടാനുള്ള നിരവധി അവസരങ്ങൾ ഇന്ത്യക്ക് ലഭിച്ചെങ്കിലും ഗോൾ മാത്രം പിറന്നില്ല.
മാൽദിവ്സിനെതിരെയാണ് ഇന്ത്യയുടെ അടുത്ത മത്സരം. ഗ്രൂപ്പിൽ ആദ്യ രണ്ടു സ്ഥാനങ്ങളിൽ എത്തുന്ന ടീം സെമിയിലെത്തും.