Category: I League

തോൽവിയോടെ തുടങ്ങിയ സീസണിൽ ഫോം വീണ്ടെടുത്ത് മുഹമ്മദൻസ്. നെരോക്ക എഫ്സിയെ ഒന്നിനെതിരെ മൂന്ന് ഗോളുകൾക്ക് തകർത്ത് അവർ ആദ്യ വിജയം സ്വന്തമാക്കി. മർകസ് ജോസഫും മലയാളി താരം ഫസലു റഹ്മാനും ജേതാക്കൾക്കായി വല കുലുക്കിയപ്പോൾ ഡേവിഡ് സിംബോ സെൽഫ്‌ ഗോളും ആതിഥേയർക്ക് തുണയായി. കസിമോവ് ആണ് നെരോക്കയുടെ ആശ്വാസ ഗോൾ നേടിയത്. മൂന്ന് മത്സരങ്ങളിൽ നിന്നും ഒരു വിജയവുമായി മുഹമ്മദൻസ് ഏഴാമതും നെരോക്ക പത്താമതും ആണ് പോയിന്റ് പട്ടികയിൽ.

ഇരു ടീമുകൾക്കും കൃത്യമായ മുൻതൂക്കം ഇല്ലാതെയാണ് മത്സരത്തിന്റെ ആദ്യ മിനിറ്റുകൾ കടന്ന് പോയത്. മികച്ച അവസരങ്ങൾ തുറന്നെടുക്കാനും ഇരു കൂട്ടർക്കും ആയില്ല. മത്സരം പലപ്പോഴും പരുക്കൻ അടവുകളിലേക്കും വഴി മാറി. നാൽപതാം മിനിറ്റിൽ ആണ് ആദ്യ ഗോൾ വീണത്. ലൂയിസ് ബോക്സിലേക്ക് നൽകിയ ക്രോസ് ക്ലിയർ ചെയ്യാനുള്ള നെരോക്ക പ്രതിരോധ താരം ഡേവിഡ് സിംബോയുടെ ശ്രമം സ്വന്തം പോസ്റ്റിലാണ് അവസാനിച്ചത്.

അമ്പത്തിയെട്ടാം മിനിറ്റിൽ നെരോക്ക സമനില നേടി. ഉസ്ബെക്കിസ്ഥാൻ താരം കസിമോവ് ബോക്സിന് പുറത്തു നിന്നും ഉതിർത്ത മികച്ചൊരു ഷോട്ട് വലയിൽ എത്തുകയായിരുന്നു. എന്നാൽ പന്ത് വരുതിയിൽ നിർത്തി പതിയെ മത്സരം കൈക്കലാക്കാൻ ശ്രമിച്ച മുഹമ്മദൻസ് എൺപതിരണ്ടാം മിനിറ്റിൽ വീണ്ടും ലീഡ് നേടി. മർകസ് ജോസഫിനെ വീഴ്ത്തിയതിന് ലഭിച്ച പെനാൽറ്റി താരം തന്നെ വലയിൽ എത്തിച്ചു. മൂന്ന് മിനിറ്റിനു ശേഷം മുഹമ്മദൻസിന്റെ വിജയം ഉറപ്പിച്ച ഗോൾ എത്തി. രണ്ടു നെരോക്ക താരങ്ങളെ മറികടന്ന് ഫസലു റഹ്‌മാൻ നേടിയ ഗോളോടെ നെരോക്ക പൂർണമായും ചിത്രത്തിൽ നിന്നും പുറത്തായി.

ശ്രീനഗർ, നവംബർ 22: ഐ ലീഗിലെ മൂന്നാം മത്സരത്തിൽ ഗോകുലം കേരള എഫ് സി റിയൽ കാശ്മീർ എഫ് സിയെ ഇന്ന് ശ്രീനഗറിലെ ടി ആർ സി ടർഫ് ഗ്രൗണ്ടിൽ വെച്ച് നേരിടും. ഉച്ചയ്ക്ക് രണ്ടു മണിക്ക് ആണ് മത്സരം.

രണ്ടു ടീമുകളും അവരുടെ ആദ്യ രണ്ടു മത്സരങ്ങളിലും വിജയം കൈവരിച്ചിട്ടാണ് നേർക്കുനേർ വരുന്നത്. ഗോകുലം മുഹമ്മദൻ സ്പോർട്ടിങ്ങിനെയും, ഐസാൾ എഫ് സിയെയും പരാജയപെടുത്തിയപ്പോൾ റിയൽ കാശ്മീർ രാജസ്ഥാൻ യൂണൈറ്റഡിനെയും, നെറോക്ക എഫ് സിയെയും തോൽപിച്ചു.

കളി യൂറോസ്പോർട്സ്, 24 ന്യൂസ് എന്നിവയിൽ തത്സമയം കാണാം.

ഐ ലീഗിൽ സീസണിലെ ആദ്യ വിജയം തേടിയിറങ്ങിയ ടീമുകളുടെ പോരാട്ടത്തിൽ അവസാന ചിരി ഐസാൾ എഫ് സിക്ക്. സുദേവ ഡൽഹിയെ ഒന്നിനെതിരെ രണ്ടു ഗോളുകൾക്കാണ് അവർ തോൽപ്പിച്ചത്. ഓരോ സമനിലയും തോൽവിയും സ്വന്തമായി ഉണ്ടായിരുന്ന ഐസാളിന്റെ സീസണിലെ ആദ്യ വിജയം ആണിത്. സുദേവ ആവട്ടെ തുടർച്ചയായ മൂന്നാം തോൽവിയാണ് നേരിട്ടത്. ഇതോടെ പോയിന്റ് പട്ടികയിൽ അവസാന സ്ഥാനത്ത് ആണ് അവർ.

രാജീവ് ഗാന്ധി സ്റ്റേഡിയയത്തിൽ സുദേവ ആണ് ആദ്യം ലീഡ് എടുത്തത്. ഗോവു കൂക്കി തൊടുത്ത ലോങ്റേഞ്ചർ തടുത്തെങ്കിലും അവസരം കാത്തിരുന്ന ലോട്ട്യെം പന്ത് വലയിൽ എത്തിച്ചു. പതിനൊന്നാം മിനിറ്റിലാണ് ആദ്യ ഗോൾ വീണത്. ഇരുപതിയാറാം മിനിറ്റിൽ ഐസാൾ സമനില ഗോൾ നേടി. കോർണറിലൂടെ എത്തിയ ബോൾ ബോക്സിനുള്ളിലെ കൂട്ടപ്പോരിച്ചിലിൽ പെട്ടപ്പോൾ കിംകിമ പന്ത് വലയിലേക്ക് എത്തിച്ചു. ആദ്യ പകുതി സമനിലയോടെ പിരിഞ്ഞ മത്സരത്തിന്റെ ഭാഗധേയം നിർണയിച്ച ഗോൾ എത്തിയത് അറുപതിനാലാം മിനിറ്റിലാണ്. അർജന്റീനൻ താരം മതിയാസ് വേറൊൺ ആണ് നിർണായ ഗോൾ നേടിയത്.

ഐ ലീഗിൽ തുടർച്ചയായ രണ്ടാം വിജയവുമായി റൗണ്ട് ഗ്ലാസ് പഞ്ചാബ്. സ്വന്തം തട്ടകത്തിൽ വെച്ചു നടന്ന മത്സരത്തിൽ മുഹമ്മദൻസിനെയാണ് എതിരില്ലാത്ത ഒരു ഗോളിന് തോൽപ്പിച്ചത്. ലൂക്ക മയ്കെനാണ് ജേതാക്കൾക്ക് വേണ്ടി വലകുലുക്കിയത്. തുടർച്ചയായ രണ്ടാം വിജയത്തോടെ പോയിന്റ് പട്ടികയിൽ രണ്ടാമതെത്താൻ പഞ്ചാബിനായി.

മൂന്നാം മിനിറ്റിൽ തന്നെ ഗോൾ വീഴുന്നത് കണ്ടാണ് മത്സരം ഉണർന്നത്. മയ്കെനും സാമുവലും ചേർന്ന കൂട്ടുകെട്ട് മുഹമ്മദൻസ് ഡിഫെൻസിനെ കീറിമുറിച്ച് കടന്നപ്പോൾ മയ്കെൻ പന്ത് വലയിൽ എത്തിച്ചു. വീണ്ടും പലതവണ താരം തന്നെ ലക്ഷ്യത്തിന് അടുത്തെത്തിയെങ്കിലും ലീഡ് ഉയർത്താൻ പഞ്ചാബിനായില്ല.

ഇത്തവണ കിരീടം നിലനിർത്താൻ ഇറങ്ങുന്ന ഗോകുലത്തിന് ഏറ്റവും വലിയ ഭീഷണി ഉയർത്തുന്ന ടീമെന്ന വമ്പുമായി എത്തിയിട്ട് ആദ്യ വിജയം നേടാൻ ആവാതെ വിഷമിക്കുകയാണ് മുഹമ്മദൻസ്. ആദ്യ മത്സരത്തിൽ ഗോകുലത്തിനോട് തന്നെ അവർ തോൽവി അറിഞ്ഞിരുന്നു. ഇതോടെ പോയിന്റ് പട്ടികയിൽ അവസാന സ്ഥാനത്താണ് മുഹമ്മദൻസ്.

ഐസാൾ, നവംബർ 17: ഐ ലീഗിലെ രണ്ടാം മത്സരത്തിൽ ഗോകുലം കേരള എഫ് സി മിസോറാം ക്ലബായ ഐസാൾ എഫ് സി യെ നാളെ (November 18 ) നേരിടും. ആദ്യ മത്സരത്തിൽ മുഹമ്മദൻ എസ് സിയെ എതിരില്ലാത്ത ഒരു ഗോളിന് തോൽപിച്ച ഗോകുലത്തിന്റെ ഈ സീസണിലെ ആദ്യത്തെ എവേ മത്സരമാണ് ഐസാവൾ ടീമിന് എതിരെ.

ഗോകുലത്തിന്റെ കാമറൂൺ സ്‌ട്രൈക്കർ സോമലാഗ, മധ്യനിര താരങ്ങൾ ഫർഷാദ് നൂർ, പ്രതിരോധത്തിൽ ക്യാപ്റ്റൻ അമിനോ ബൗബ എന്നിവരുടെ പിൻബലത്തിൽ ആയിരിക്കും ഗോകുലം ഐസാവാളിനു എതിരെ ഇറങ്ങുക.

അതേസമയം, ഐസാവൾ അവരുടെ ആദ്യ മത്സരത്തിൽ മണിപ്പുരിൽ നിന്നുമുള്ള ട്രാവു എഫ് സിയോട് 1 -1 സമനിലയിൽ പിരിഞ്ഞതിന് ശേഷമാണു ഗോകുലത്തിനെ നേരിടുന്നത്.

കളി ഉച്ചയ്ക്ക് 2 മണിക്ക് യൂറോ സ്പോർട്സ് ചാനലിലും 24 ന്യൂസിലും തത്സമയം ഉണ്ടാകും.

ഐ ലീഗിലെ തങ്ങളുടെ ആദ്യ മത്സരത്തിൽ സമനിലയിൽ പിരിഞ്ഞു ഐസാളും ട്രാവു എഫ്സിയും. രാജീവ് ഗാന്ധി സ്റ്റേഡിയത്തിൽ ഓരോ ഗോൾ വീതമടിച്ചാണ് ഇരു ടീമുകളും പോയിന്റ് പങ്കുവെച്ചത്. ഐസ്വാളിനായി ലാൽരിൻഫെല ഗോൾ നേടിയപ്പോൾ ട്രാവുവിന് വേണ്ടി ബികാശ് സിങാണ് വലകുലുക്കിയത്.

പതിനെട്ടാം മിനിറ്റിലാണ് ആദ്യ ഗോൾ വന്നത്. യുവതാരം ബികാശ് സിങ് ട്രാവുവിനെ മുന്നിൽ എത്തിച്ചു. പിന്നീട് കിസെക്കയുടെ ഹെഡർ ലക്ഷ്യത്തിൽ നിന്നും അകന്ന് പോയതോടെ ആദ്യ പകുതി ഐസ്വാളിന് സമനില നേടാൻ ആയില്ല. എന്നാൽ രണ്ടാം പകുതിയുടെ തുടക്കത്തിൽ തന്നെ ഐസ്വാൾ തിരിച്ചടിച്ചു. ഗോൾ കീപ്പർ ബിഷോർജിത്തിന്റെ പിഴവ് തുണയായപ്പോൾ ലാൽരിൻഫെല സമനില ഗോൾ കണ്ടെത്തി. എഴുപതിയേട്ടാം മിനിറ്റിൽ മത്തിയാസ് വെറൊൺ ചുവപ്പ് കാർഡ് കണ്ടതോടെ ഐസ്വാൾ പത്ത് പേരിലേക്ക് ചുരുങ്ങി. മത്സരത്തിന്റെ അവസാന നിമിഷങ്ങളിൽ കിസെക്കയുടെ മികച്ചൊരു ഷോട്ട് തടുത്ത് കീപ്പർ ബിഷോർജിത് ട്രാവുവിന്റെ രക്ഷക്കെത്തി.