ഐ ലീഗിൽ ഇന്ന് നടന്ന മത്സരത്തിൽ നേരോക്കയെ വീഴ്ത്തി രാജസ്ഥാൻ യുണൈറ്റഡ് വിജയം നേടി. അംബേദ്കർ സ്റ്റേഡിയത്തിൽ വെച്ചു നടന്ന മത്സരത്തിൽ എതിരില്ലാത്ത ഒരു ഗോളിനാണ് ആതിഥേയർ വിജയം കണ്ടത്. ഇതോടെ പോയിന്റ് പട്ടികയിൽ നാലാമത്തെത്താനും അവർക്കായി. രാജസ്ഥാന്റെ തുടർച്ചായി രണ്ടാം വിജയം ആണിത്. നെരോക്ക ഏഴാമത് തുടരുകയാണ്. അയ്ദാർ മാമ്പറ്റലീവ് ആണ് രാജസ്ഥാന്റെ ഗോൾ നേടിയത്.
ആർക്കും മുൻ തൂക്കമില്ലാതെയാണ് മത്സരത്തിന്റെ ആദ്യ മിനിറ്റുകൾ കടന്ന് പോയത്. ലക്ഷ്യത്തിലേക്ക് ഉന്നം വെക്കാൻ ഇരു ടീമുകളും മടിച്ചു. മുപ്പത്തിയെട്ടാം മിനിറ്റിൽ മത്സരത്തിന്റെ വിധി നിർണയിച്ച ഗോൾ എത്തി. കിർഗിസ്ഥാൻ താരം അയ്ദാറിന്റെ ഗോൾ ആതിഥേയരെ മുന്നിൽ എത്തിച്ചു. പതിമൂന്നോളം തവണ ഷോട്ട് ഉതിർത്ത രാജസ്ഥാന്റെ ഒരേയൊരു ഷോട്ട് ആണ് ലക്ഷ്യത്തിന് നേരെ എത്തിയത്. സമനില നേടാനുള്ള നെരോക്കയുടെ ശ്രമങ്ങൾക്ക് രാജസ്ഥാൻ കീപ്പർ അലി സർദാർ വിലങ്ങു തടിയായി. വിജയികളുടെ നീക്കങ്ങൾക്ക് ചുക്കാൻ പിടിച്ച ബെയ്ട്ടിയ ആണ് പ്ലെയർ ഓഫ് ദ് മാച്ച്.