ഐ ലീഗ് എട്ടാം റൗണ്ട് മത്സരത്തിൽ നെറോക്കയോട് സമനിലയിൽ കുരുങ്ങി ഗോകുലം കേരള. പയ്യനാട് സ്റ്റേഡിയത്തിൽ ഗോൾ രഹിത സമനിലയിൽ പിരിഞ്ഞാണ് ഇരു ടീമുകളും പോയിന്റ് പങ്കുവെച്ചത്. വിജയിച്ചിരുന്നെങ്കിൽ ഒന്നാം സ്ഥാനത്തേക്ക് കയാറാമായിരുന്ന അവസരം ഗോകുലം, സ്വന്തം തട്ടകത്തിലെ നാല് മത്സരങ്ങളിൽ നിന്നായി ആദ്യമായാണ് പോയിന്റ് നഷ്ടപ്പെടുത്തുന്നത്. പതിനഞ്ച് പോയിന്റുമായി മൂന്നാം സ്ഥാനത്ത് തുടരുകയാണ് ഗോകുലം. നെറോക്ക പത്താം സ്ഥാനത്താണ്.
പന്ത് കൈവശം വെക്കുന്നതിൽ ആയിരുന്നു നെറോക്കയുടെ ശ്രദ്ധ. എന്നാൽ കൃത്യമായ അവസരങ്ങൾ ഇരുഭാഗത്തും ആദ്യ നിമിഷങ്ങളിൽ തുറന്നെടുത്തില്ല. മുപ്പതാം മിനിറ്റിൽ ഷിജിന്റെ ഷോട്ട് പോസ്റ്റിൽ തട്ടി വഴിമാറി. രണ്ടാം പകുതിയുടെ തുടക്കത്തിൽ നെറോക്ക ഫോർവേഡ് ഹോകിപ്പിന്റെ ഷോട്ട് ശിബിൻരാജ് രക്ഷപ്പെടുത്തി. പകരക്കാരെ ഇറക്കി ആക്രമണം കനപ്പിക്കാൻ ആയിരുന്നു പിന്നീട് ഗോകുലത്തിന്റെ ശ്രമം. ക്രോസിലൂടെ എത്തിയ ബോളിൽ ഹോകിപ്പിന്റെ ഹെഡർ ലക്ഷ്യത്തിൽ നിന്നും അകന്ന് പോയി.
അവസാന മിനിറ്റുകളിൽ കോർണറിലൂടെ എത്തിയ ബോളിൽ ബോബയുടെ ഹെഡർ ശ്രമവും പോസ്റ്റിന് തൊട്ടിരുമി കടന്ന് പോയതോടെ മത്സരം സമനിലയിൽ അവസാനിച്ചു.
