ഐ ലീഗിന്റെ പുതിയ സീസണ് ഇന്ന് തുടക്കമാവുകയാണ്. ഇന്ന് സീസണിലെ ആദ്യ മത്സരത്തിൽ നമ്മുടെ സ്വന്തം ക്ലബായ ഗോകുലം കേരള കിരീട പോരാട്ടത്തിൽ അവർക്ക് ഏറ്റവും വലിയ വെല്ലുവിളി ആകുമെന്ന് കരുതുന്ന മൊഹമ്മദൻസിനെ നേരിടും. മഞ്ചേരി പയ്യനാട് സ്റ്റേഡിയത്തിൽ വെച്ചാണ് മത്സരം നടക്കുന്നത്. സന്തോഷ് ട്രോഫിയിൽ എന്ന പോലെഐ ലീഗിനും പയ്യനാട് സ്റ്റേഡിയം നിറയും എന്ന പ്രതീക്ഷയിലാണ് ഫുട്ബോൾ ലോകം.
ഗോകുലത്തിന്റെ സീസണിലെ ആദ്യ ആറ് ഹോം മത്സരങ്ങൾക്ക് ആകും പയ്യനാട് സ്റ്റേഡിയം വേദിയാവുക. അവസാന രണ്ട് സീസണിലും ഐ ലീഗ് കിരീടം നേടിയ ഗോകുലം ഹാട്രിക് കിരീടം ആണ് ലക്ഷ്യമിടുന്നത്‌. ഇത്തവണ ലീഗ് കിരീടം നേടിയാൽ ഗോകുലം കേരളക്ക് പ്രൊമോഷൻ നേടി ഐ എസ് എല്ലിൽ എത്താൻ ആകും എന്ന പ്രത്യൃകതയുണ്ട്.
കാമറൂൺ പരിശീലകനായ റിച്ചാർഡ് ടോവയുടെ കീഴിൽ ആണ് ഗോകുലം ഇറങ്ങുന്നത്. ആറ് വിദേശ താരങ്ങൾ ഉള്ള ഗോകുലം ടീമിൽ നിറയെ മലയാളി താരങ്ങളും ഉണ്ട്. 24 അംഗ സ്ക്വാഡിൽ 12 പേർ മലയാളികൾ ആണ്. അർജുൻ ജയരാജ്, നൗഫൽ, മുഹമ്മദ് ജാസിം, അഖിൽ, താഹിർ സമാൻ, ശ്രീകുട്ടൻ, ഷിജിൻ ടി, സൗരവ്, ഷഹജാസ്, ശിബിൻ രാജ്, രാഹുൽ രാജു, റിഷാദ് എന്നി മലയാളികളാണ് ടീമിൽ ഉള്ളത്.
വൈകിട്ട് 4.30ന് നടക്കുന്ന മത്സരം യൂറോ സ്പോർടിൽ തത്സമയം കാണാം.
