വാര്‍ രക്ഷകെത്തി; സ്വീഡന് കൊറിയക്ക് മേല്‍ വിജയം

- Advertisement -

ഗോള്‍ രഹിതമായി പിരിഞ്ഞ ആദ്യ പകുതിക്ക് ശേഷം വാര്‍ ടെക്നോളജി രക്ഷക്കെത്തിയപ്പോള്‍ സ്വീഡന്‍ കൊറിയയെ ഏകപക്ഷീയമായ ഒരു ഗോളിന് പരാജയപ്പെടുത്തി. 65ആം മിനിറ്റില്‍ ലഭിച്ച പെനാല്‍റ്റിയിലൂടെയാണ് സ്വീഡന്‍ ഏഷ്യന്‍ ടീമിനെ പരാജയപ്പെടുത്തിയത്.

വിരസമായി തുടങ്ങിയ മത്സരത്തിൽ ഒരു ഷോട്ട് പിറക്കാൻ 20 മിനിറ്റ് വരെ കാത്തിരിക്കേണ്ടി വന്നിരുന്നു. തുടർന്ന് നിരന്തരം കൊറിയൻ ഗോൾ മുഖത്ത് എത്തിയ സ്വീഡൻ ഗോൾ നേടുന്നതിൽ നിന്നും പരാജയപ്പെട്ടു. കീപ്പർ ജോ ആണ് സ്വീഡന് മുന്നിൽ വിലങ്ങു തടിയായി നില്‍ക്കുകയായിരുന്നു.

രണ്ടാം പകുതിയിലും കാര്യമായ ചലനങ്ങള്‍ ഒന്നും ഇരു ടീമുകള്‍ക്കും ഉണ്ടാവാന്‍ കഴിഞ്ഞില്ല. എന്നാൽ 64ആം മിനിറ്റിൽ വിക്ടർ ക്ലാസണെ പകരക്കാരനായി വന്ന കിം മിൻ വൂ വീഴ്ത്തിയതിന് വാർ ടെക്‌നോളജി പെനാൽറ്റി അനുവദിക്കുകയായിരുന്നു. റഫറി ആദ്യം പെനാൽറ്റി നിഷേധിച്ചു കളി തുടരാൻ ആവശ്യപ്പെട്ടു എങ്കിലും വാർ ഇടപെടുകയായിരുന്നു. പെനാൽറ്റി എടുത്ത ആൻഡ്രെസ്സ്‌ ഗ്രനഖ്‌വിസ്റ്റ്നു പിഴച്ചില്ല, സ്വീഡന്റെ നാനൂറു മിനിറ്റോളം നീണ്ട ഗോൾ വരൾച്ചയ്ക്ക് വിരാമമിട്ട് സ്വീഡനെ മത്സരത്തിൽ മുന്നിൽ എത്തിച്ചു.

രണ്ടാം പകുതിയിൽ കൂടുതൽ സമയവും പന്ത് കൈവശം വെച്ചെങ്കിലും സ്വീഡൻ പ്രതിരോധം തകർക്കാൻ കഴിയാതിരുന്നതാണ് കൊറിയൻ ടീമിന് തിരിച്ചടിയായത്. 92ആം മിനിറ്റിൽ ബോക്സിൽ മാർക് ചെയ്യപ്പെടാതെ നിന്നിരുന്ന ഹ്വാങ്ങിനു മികച്ചൊരു ക്രോസ് ലഭിച്ചു എങ്കിലും താരത്തിന്റെ ഹെഡർ പുറത്തേക്ക് പോയതോടെ മത്സരത്തിലെ കൊറിയൻ പ്രതീക്ഷകൾ അവസാനിച്ചു.

കൂടുതൽ കായിക വാർത്തകൾക്ക് : www.facebook.com/FanportOfficial

Advertisement