റയൽ മാഡ്രിഡിന്റെ സൂപ്പർ താരം ക്രിസ്റ്റിയാനോ റൊണാൾഡോ റയലിൽ തന്നെ തുടരുമെന്ന് ക്രൊയേഷ്യൻ താരം ലൂക്ക മോഡ്രിച്. സീരി എ ചാമ്പ്യന്മാരായ യുവന്റസിലേക്ക് റൊണാൾഡോ മാറുമെന്ന വാർത്തകൾ തുടർച്ചയായി വരുന്നതിനു പിന്നാലെയാണ് മോഡ്രിച് മനസ് തുറന്നത്. ലോകത്തെ ഏറ്റവും മികച്ച താരമായ ക്രിസ്റ്റിയാനോ മാഡ്രിഡിൽ തന്നെ തുടരുമെന്നാണ് താൻ വിശ്വസിക്കുന്നത്. യൂറോപ്പിലെ മറ്റൊരു ക്ലബിന് വേണ്ടി ക്രിസ്റ്റിയാനോ കളിക്കുന്നത് ചിന്തിക്കാൻ പോലുമാകുന്നില്ലെന്നും അദ്ദേഹം കൂട്ടിച്ചേർത്തു.
33 കാരനായ മോഡ്രിച് ഇന്നലെ റഷ്യയെ ഷൂട്ട്ഔട്ടിൽ പരാജയപ്പെടുത്തി ക്രൊയേഷ്യ സെമി ഫൈനലിൽ എത്തിയതിനു ശേഷമാണ് ക്രിസ്റ്റിയാനോ വിഷയത്തിൽ മനസ് തുറന്നത്. ലോകകപ്പിൽ നിന്നും പോർച്ചുഗൽ പുറത്ത് പോയതിന്റെ പിന്നാലെയാണ് ടൂറിനിലേക്ക് ക്രിസ്റ്റിയാനോ റൊണാൾഡോ പോകുമെന്ന വാർത്തകൾ വരാൻ തുടങ്ങിയത്. നൂറു മില്യൺ യൂറോയാണ് ക്രിസ്റ്റിയാനോ റൊണാൾഡോയ്ക്ക് യുവന്റസ് ഇട്ട വിലയെന്നാണ് പുറത്ത് വരുന്ന റിപ്പോർട്ടുകൾ.
കൂടുതൽ കായിക വാർത്തകൾക്ക് : www.facebook.com/FanportOfficial
