മാഞ്ചസ്റ്റർ സിറ്റിയുടെ സൂപ്പർതാരം ജാക്ക് ഗ്രീലിഷിനെ ഒരു സീസൺ ലോണിൽ സ്വന്തമാക്കാൻ എവർട്ടൺ ചർച്ചകൾ ആരംഭിച്ചു. അത്ലറ്റിക് ആണ് ഈ വാർത്ത റിപ്പോർട്ട് ചെയ്തിരിക്കുന്നത്. 29-കാരനായ ഇംഗ്ലീഷ് താരത്തെ ടീമിലെത്തിക്കാൻ എവർട്ടൺ കഠിനമായി പരിശ്രമിക്കുന്നുണ്ട്.
കഴിഞ്ഞ സീസണിൽ വെറും ഏഴ് പ്രീമിയർ ലീഗ് മത്സരങ്ങളിൽ മാത്രമാണ് ഗ്രീലിഷിന് ആദ്യ ഇലവനിൽ ഇടം നേടാനായത്.
2021-ൽ 100 മില്യൺ പൗണ്ടിന് ആസ്റ്റൺ വില്ലയിൽ നിന്ന് സിറ്റിയിലെത്തിയ ഗ്രീലിഷ്, 2022-23 സീസണിൽ സിറ്റിയുടെ ചരിത്രപരമായ ട്രെബിൾ വിജയത്തിൽ നിർണായക പങ്കുവഹിച്ചിരുന്നു. ആ സീസണിലെ എല്ലാ ചാമ്പ്യൻസ് ലീഗ് നോക്കൗട്ട് മത്സരങ്ങളിലും താരം ആദ്യ ഇലവനിൽ ഉണ്ടായിരുന്നു. എന്നാൽ അതിനുശേഷം അദ്ദേഹത്തിന്റെ പ്രകടനം താഴോട്ടാണ്.
കഴിഞ്ഞ രണ്ട് പ്രീമിയർ ലീഗ് സീസണുകളിലായി ഓരോ വർഷവും 20 മത്സരങ്ങൾ മാത്രമാണ് ഗ്രീലിഷ് കളിച്ചത്. 2024-25 സീസണിൽ വെറും ഒരു ഗോളും ഒരു അസിസ്റ്റും മാത്രമാണ് അദ്ദേഹത്തിന്റെ സംഭാവന.
അന്താരാഷ്ട്ര തലത്തിലും ഗ്രീലിഷിന്റെ സ്ഥിതി മെച്ചപ്പെട്ടിട്ടില്ല. യൂറോ 2024 സ്ക്വാഡിൽ നിന്ന് ഗാരത് സൗത്ത്ഗേറ്റ് ഒഴിവാക്കിയതിന് ശേഷം ഇംഗ്ലണ്ടിന് വേണ്ടി അദ്ദേഹം കളിച്ചിട്ടില്ല. പുതിയ കോച്ച് തോമസ് ടൂഹെൽ ഇതുവരെ താരത്തെ ടീമിലേക്ക് തിരിച്ചുവിളിച്ചിട്ടില്ല.