Category: European Super League

വിവാദമായി കൊണ്ടിരിക്കുന്ന യൂറോപ്യൻ സൂപ്പർ ലീഗിനെ കുറിച്ചുള്ള് ചോദ്യങ്ങളിൽ നിന്ന് സിദാൻ ഒഴിഞ്ഞു മാറി. സൂപ്പർ ലീഗിനെ കുറിച്ച് സംസാരിക്കാനില്ല എന്നും സൂപ്പർ ലീഗ് തന്റെ വിഷയമല്ല എന്നും ക്ലബ് പ്രസിഡന്റ് ആണ് ഈ കാര്യത്തിൽ അഭിപ്രായം പറയേണ്ടത് എന്നും സിദാൻ പറഞ്ഞു. റയൽ മാഡ്രിഡ് പ്രസിഡന്റായ പെരസ് ആണ് സൂപ്പർ ലീഗ് ആശയത്തിനു പിറകിൽ.

എല്ലാവർക്കും ഈ വിഷയത്തിൽ അഭിപ്രായം ഉണ്ടാകും എന്നും എന്നാൽ താൻ ഇപ്പോൾ ശ്രദ്ധ കൊടുക്കുന്നത് വരാനുള്ള മത്സരങ്ങളിലും ചാമ്പ്യൻസ് ലീഗിലും ആണെന്നും സിദാൻ പറഞ്ഞു. ലിവർപൂൾ പരിശീലകൻ ക്ലോപ്പ് ഒക്കെ പരസ്യമായി സൂപ്പർ ലീഗിനെ തള്ളുമ്പോൾ ആണ് സിദാൻ മൗനം പാലിക്കുന്നത്.

യൂറോപ്യൻ സൂപ്പർ ലീഗ് എന്ന ആശയത്തിന് ഫിഫയും എതിരാണ് എന്ന് ഫിഫ പ്രസിഡന്റ് ഇൻഫന്റീനോ. സൂപ്പർ ലീഗ് തുടങ്ങിയത് ഫിഫയുടെ ചട്ടങ്ങൾക്കും ആശയങ്ങൾക്കും എതിരാണെന്നും ഫിഫ സൂപ്പർ ലീഗിനെ ഒരിക്കലും അംഗീകരിക്കില്ല എന്നും ഇൻഫന്റീനോ പറഞ്ഞു. ഇത് ആരംഭിച്ചവർ ഇതിന്റെ പരിണിത ഫലങ്ങൾ അനുഭവിക്കേണ്ടി വരും. അവർ തുടങ്ങിയതിന് അവർ മാത്രമാണ് ഉത്തരാവാദികൾ. അദ്ദേഹം പറഞ്ഞു.

സൂപ്പർ ലീഗിൽ കളിക്കുന്നവർക്ക് അതിൽ മാത്രം കളിക്കാം എന്നും രണ്ടു സ്ഥലത്തും നിൽക്കുന്നത് നടപ്പാകില്ല എന്നും ഇൻഫന്റീനോ പറഞ്ഞു. ഇവർ ഒരു അടഞ്ഞു കിടക്കുന്ന കടയാണ് ആരംഭിക്കുന്നത് എന്നും ഇത് ലീഗുകളെയും മറ്റു ടൂർണമെന്റുകളുടെയും സന്തുലിതാവസ്ഥ ഇല്ലാതാക്കും എന്നും ഇൻഫന്റീനോ പറഞ്ഞു. ചെറിയ സാമ്പത്തിക നേട്ടത്തിനു വേണ്ടി ഇവർ നഷ്ടപ്പെടുത്തുന്നത് വലിയ കാര്യങ്ങൾ ആണെന്നും അദ്ദേഹം പറഞ്ഞു.

കഴിഞ്ഞ ദിവസം യൂറോപ്പിലെ വമ്പൻ ടീമുകൾ ചേർന്ന് പ്രഖ്യാപിച്ച യൂറോപ്യൻ സൂപ്പർ ലീഗിൽ പങ്കെടുക്കുന്നതിന്റെ പേരിൽ യുവേഫക്ക് താരങ്ങളെ വിലക്കാൻ കഴിയില്ലെന്ന് റയൽ മാഡ്രിഡ് പ്രസിഡന്റും യൂറോപ്യൻ സൂപ്പർ ലീഗിന്റെ മുഖ്യ സൂത്രധാരനുമായ ഫ്ലോരെന്റിനോ പെരസ്. യൂറോപ്യൻ സൂപ്പർ ലീഗിൽ പങ്കെടുത്താൽ താരങ്ങളെ ലോകകപ്പിലും നിന്നും യൂറോ കപ്പിലും നിന്നും വിലക്കുമെന്ന യുവേഫ പ്രസിഡന്റ് അലക്സാണ്ടർ സെഫറിന്റെ പ്രസ്താവനയോട് പ്രതികരിക്കുകയായിരുന്നു പെരസ്.

ഫുട്ബോളിനെ രക്ഷിക്കാൻ വേണ്ടിയാണ് തങ്ങൾ യൂറോപ്യൻ സൂപ്പർ ലീഗിന് തുടക്കം കുറിച്ചതെന്നും ഫുട്ബോളിന്റെ നിലനിൽപിന് ഇത് ആവശ്യമാണെന്നും പെരസ് പറഞ്ഞു. യൂറോപ്പിലെയും സ്പെയിനിലെയും വമ്പൻ ക്ലബികൾ നിലവിൽ സാമ്പത്തിക പ്രതിസന്ധിയിൽ ആണെന്നും കഴിഞ്ഞ രണ്ട് വർഷത്തിനിടെ റയൽ മാഡ്രിഡിന്റെ നഷ്ട്ടം 400 മില്യൺ ആണെന്നും പെരസ് പറഞ്ഞു. ടെലിവിഷൻ സംപ്രേഷണത്തിലൂടെ മാത്രം വരുമാനം വരുന്ന ഈ സമയത് കൂടുതൽ മികച്ച മത്സരങ്ങൾ ഒരുക്കി വരുമാനം കൂട്ടുക മാത്രമാണ് വഴിയെന്നും പെരസ് കൂട്ടിച്ചേർത്തു. 2020ൽ തന്നെ യൂറോപ്യൻ സൂപ്പർ ലീഗ് തുടങ്ങാനാണ് ശ്രമം എന്നും പെരസ് പറഞ്ഞു.

യൂറോപ്യൻ സൂപ്പർ ലീഗ് യാഥാർത്ഥ്യമാകരുത് എന്നും ഇത് ഫുട്ബോളിനെ തന്നെ നശിപ്പിക്കുന്ന നീക്കമാണ് എന്നും യുവേഫ പ്രസിഡന്റ് അലക്സാണ്ടർ സെഫറിൻ. ചില ക്ലബുകളുടെ ആർത്തി മാത്രമാണ് സൂപ്പർ ലീഗ് എന്ന ആശയത്തിനു പിറകിൽ ഉള്ളത് എന്ന് അലക്സാണ്ടർ പറയുന്നു. മൊത്തം ഫുട്ബോൾ അസോസിയേഷനുകൾ മാത്രമല്ല എല്ലാ രാജ്യത്തെയും ഗവണ്മെന്റുകളും യുവേഫക്ക് ഒപ്പം ആണ് ഈ വിഷയത്തിൽ എന്ന് അദ്ദേഹം പറഞ്ഞു.

ഫുട്ബോളിനെ സ്നേഹിക്കുന്നവർ എല്ലാവരും ഒരുമിച്ച് ഈ നീക്കത്തെ പരാജയപ്പെടുത്തും എന്നും അദ്ദേഹം പറഞ്ഞു. സൂപ്പർ ലീഗിൽ കളിക്കുന്ന ക്ലബുകളും താരങ്ങളും വിലക്ക് നേരിടും. താരങ്ങൾക്ക് പിന്നെ രാജ്യത്തിനു വേണ്ടി പോലും കളിക്കാൻ ആകില്ല അദ്ദേഹം പറഞ്ഞു. താരങ്ങളും പരിശീലകരും ഒക്കെ സൂപ്പർ ലീഗിനെതിരെ രംഗത്തു വരണം എന്നും യുവേഫ പ്രസിഡന്റ് ആവശ്യപ്പെട്ടു. ഫുട്ബോൾ ജനങ്ങളിൽ നിന്ന് എടുക്കാൻ ആരെയും സമ്മതിക്കില്ല എന്നും യുവേഫ പ്രസിഡന്റ് പറഞ്ഞു.

സമ്പന്ന ക്ലബുകളെ കൂടുതൽ സമ്പന്നരാക്കാൻ ആണ് യൂറോപ്യൻ സൂപ്പർ ലീഗ് വരുന്നത് എന്ന വിമർശനങ്ങളെ തള്ളി റയൽ മാഡ്രിഡ് പ്രസിഡന്റ് പെരസ്. യൂറോപ്യൻ സൂപ്പർ ലീഗ് ആശയത്തിന്റെ പിറകിലെ പ്രധാന തലയാണ് പെരസ്. സമ്പന്നർക്ക് വേണ്ടിയല്ല സൂപ്പർ ലീഗ് വരുന്നത് എന്നും ഫുട്ബോളിനെ സംരക്ഷിക്കാൻ വേണ്ടിയാണ് സൂപ്പർ ലീഗ് വരുന്നത് എന്നും പെരസ് പറഞ്ഞു. ഫുട്ബോൾ നിലനിൽക്കണം എങ്കിൽ സൂപ്പർ ലീഗ് വന്നേ പറ്റൂ എന്ന് അദ്ദേഹം പറയുന്നു.

ക്ലബുകൾ എല്ലാം സാമ്പത്തിക പ്രതിസന്ധിയിൽ ആണ്. ബാഴ്സലോണ അടക്കമുള്ള ക്ലബുകൾ ക്ഷണം പെട്ടെന്ന് സ്വീകരിച്ചത് അവരുടെ ഒക്കെ സാമ്പത്തിക സ്ഥിതി പരിതാപകരമായത് കൊണ്ടാണ് പെരസ് പറഞ്ഞു. ഫുട്ബോളൊലെ യുവേഫയുടെ ഏകാധിപത്യം അവസാനിപ്പിക്കേണ്ടതുണ്ട് എന്നും അവർ ആണ് ഫുട്ബോൾ കൊണ്ട് പണം ഉണ്ടാക്കുന്നത് എന്നും പെരസ് പറഞ്ഞു. പി എസ് ജിയെയും ജർമ്മൻ ക്ലബുകളെയും ഇതുവരെ സൂപ്പർ ലീഗിലേക്ക് ക്ഷണിച്ചിട്ടില്ല എന്നും അടുത്ത് തന്നെ അവരും ഒപ്പം വരും എന്നും പെരസ് പറഞ്ഞു.

യൂറോപ്യൻ സൂപ്പർ ലീഗിനെതിരെ ബ്രസീലിയൻ താരം ഡാനി ആൽവസും രംഗത്ത്. ഫുട്ബോൾ എന്നും എന്നും ജീവിതങ്ങൾ മാറ്റിമറിക്കുന്ന ഒരു കായിക ഇനം ആയിരുന്നു. അങ്ങനെ തന്നെ അത് തുടരണം. ആൽവസ് പറഞ്ഞു. സൂപ്പർ ലീഗ് ഫുട്ബോളിന് നല്ലതല്ല എന്ന് ആൽവസ് പറഞ്ഞു. സൂപ്പർ ലീഗ് സമ്പന്ന ക്ലബുകളെ കൂടുതൽ സമ്പന്നരാക്കുകയെ ചെയ്യൂ എന്നാണ് ഫുട്ബോൾ ലോകത്ത് നിന്ന് ആകെ ഉയരുന്ന വിമർശനം. ഇതു തന്നെയാണ് ആൽവസും പറയുന്നത്.

ചെറിയ മനുഷ്യരും ചെറിയ ക്ലബുകളും സ്വപ്നം കാണുന്നത് സ്വപനങ്ങൾ സാക്ഷാത്കരിക്കുന്നതും ഫുട്ബോൾ വഴിയാണ്. വലിയവർ ചേർന്ന് ചെറിയവർ വലിയ സ്വപ്നം കാണുന്നത് ഇല്ലാതാക്കാരുത് എന്ന് ആൽവസ് പറഞ്ഞു. ആൽവസിന്റെ മുൻ ക്ലബുകളായ ബാഴ്സലോണയും യുവന്റസും യൂറോപ്യൻ സൂപ്പർ ലീഗിന്റെ ഭാഗമാണ്.

ഫുട്ബോൾ ലോകത്തെ ചർച്ചാ വിഷയമായ യൂറോപ്യൻ സൂപ്പർ ലീഗ് നടക്കരുത് എന്നാണ് താൻ ആഗ്രഹിക്കുന്നത് എന്ന് ലിവർപൂൾ മധ്യനിര താരം ജെയിംസ് മിൽനർ. താൻ സൂപ്പർ ലീഗ് ഇഷ്ടപ്പെടുന്നില്ല എന്നും ഇത് നടക്കാതിരിക്കട്ടെ എന്നും മിൽനർ പറഞ്ഞു. ഇന്നലെ ലീഡ്സ് യുണൈറ്റഡുമായുള്ള മത്സരത്തിനു ശേഷം സംസാരിക്കുക ആയിരുന്നു താരം.

സൂപ്പർ ലീഗ് ആണ് ചർച്ചാ വിഷയം എങ്കിലും കളിക്കാർ എല്ലാവരും കളിയിലേക്ക് മാത്രം ശ്രദ്ധ തിരിക്കാൻ ശ്രമിക്കുന്നുണ്ട് എന്ന് മിൽനർ പറഞ്ഞു. കളിക്കാർ ഈ വിഷയത്തിൽ യാതൊരു പങ്കാളിത്തവും ഇല്ലായെന്നും മിൽനർ പറഞ്ഞു. ലിവർപൂൾ പരിശീലകൻ ക്ലോപ്പും സൂപ്പർ ലീഗിനെതിരെ കഴിഞ്ഞ ദിവസം സംസാരിച്ചിരുന്നു.