യൂറോപ്പ ലീഗിൽ സെവിയ്യക്ക് ഉജ്ജ്വല ജയം. ബെൽജിയൻ ക്ലബായ സ്റ്റാൻഡേർഡ് ലീഗിനെയാണ് സെവിയ്യ ഒന്നിനെതിരെ അഞ്ചു ഗോളുകൾക്ക് തോൽപ്പിച്ചത്. മത്സരത്തിന്റെ തുടക്കത്തിൽ ഒപ്പത്തിനൊപ്പം പൊരുതിയ സ്റ്റാൻഡേർഡ് ലീഗിനെ രണ്ടാം പകുതിയിൽ മികച്ച പ്രകടനം കാഴ്ചവെച്ച സെവിയ്യ തോൽപ്പിക്കുകയായിരുന്നു.
സെവിയ്യക്ക് വേണ്ടി ബനേഗയും ബെൻ യെഡറും രണ്ടു ഗോളുകൾ നേടിയപ്പോൾ വസ്കസ് ഒരു ഗോൾ നേടി. സ്റ്റാൻഡേർഡ് ലീഗിന്റെ ആശ്വാസ ഗോൾ ഡെൻപോയാണ് നേടിയത്. ഒരു വേള മത്സരത്തിൽ സെവിയ്യക്കെതിരെ സമനില പിടിച്ചെങ്കിലും തുടർന്ന് സെവിയ്യ ആക്രമണത്തെ തടഞ്ഞു നിർത്താൻ സ്റ്റാൻഡേർഡ് ലീഗിനായില്ല.