മാഞ്ചസ്റ്റർ യുണൈറ്റഡ് ഇന്ന് യൂറോപ്പ ക്വാർട്ടർ ഫൈനലിൽ സെവിയ്യയെ നേരിടും. ഓൾഡ്ട്രാഫോർഡിൽ വെച്ച് ആണ് മത്സരം നടക്കുന്നത്. രാത്രി 12.30ന് നടക്കുന്ന കളി തത്സമയം സോണി സ്പോർട്സ് ചാനലിലും സോണി ലഒവ് ആപ്പിലും കാണാം. മാഞ്ചസ്റ്റർ യുണൈറ്റഡിന് സെവിയ്യ ഒരിക്കലും എളുപ്പമുള്ള എതിരാളികൾ ആയിരുന്നില്ല. ഇന്നും അതിനു വലിയ മാറ്റം ഉണ്ടാകാൻ സാധ്യതയില്ല. യൂറോപ്പയിൽ ക്വാർട്ടറിൽ എത്തി എങ്കിലും സെവിയ്യ ലാലിഗയിൽ അത്ര നല്ല ഫോമിൽ അല്ല.
അവർ ലാലിഗയിൽ 13ആം സ്ഥാനത്താണ് ഇപ്പോൾ ഉള്ളത്. അവസാന നാലു മത്സരങ്ങളിൽ ഒരു മത്സരം മാത്രമേ അവർ വിജയിച്ചിട്ടുമുള്ളൂ. മറുവശത്ത് മാഞ്ചസ്റ്റർ യുണൈറ്റഡ് രണ്ട് നല്ല വിജയങ്ങളുമായി ഫോമിൽ തിരികെയെത്തിയിട്ടുണ്ട്. പ്രത്യേകിച്ച് ഹോം ഗ്രൗണ്ടിൽ മാഞ്ചസ്റ്റർ യുണൈറ്റഡ് ഈ സീസണിൽ നല്ല ഫോമിൽ ആണ്. എന്നാൽ ഇന്ന് യുണൈറ്റഡിനൊപ്പം അവരുടെ പ്രധാന സ്ട്രൈക്കർ മാർക്കസ് റാഷ്ഫോർഡ് ഉണ്ടാകില്ല. ലൂക് ഷോയും പരിക്ക് കാരണം ഇന്ന് ടീമിൽ ഇല്ല.