യൂറോപ്പ ലീഗിൽ ഇന്ന് മാഞ്ചസ്റ്റർ യുണൈറ്റഡ് ഗ്രൂപ്പിലെ അവസാന മത്സരത്തിൽ റയൽ സോസിഡാഡിനെ നേരിടും. സ്പെയിനിൽ സോസിഡാഡിന്റെ ഹോം ഗ്രൗണ്ടിൽ ആയിരിക്കും മത്സരം നടക്കുക. ഇപ്പോൾ ഗ്രൂപ്പിൽ റയൽ സോസിഡാഡാണ് ഒന്നാമത് ഉള്ളത്. മാഞ്ചസ്റ്റർ യുണൈറ്റഡ് രണ്ടാമതും. ഇരു ടീമുകളും അടുത്ത റൗണ്ടിലേക്ക് കടക്കും എന്ന് ഉറപ്പായിട്ടുണ്ട്. എന്നാലും കാര്യങ്ങൾ എളുപ്പമാക്കാൻ ഇരുവർക്കും ഗ്രൂപ്പിലെ ഒന്നാം സ്ഥാനം തന്നെ നേടേണ്ടതുണ്ട്.
നേരത്തെ ഓൾഡ് ട്രാഫോർഡിൽ വെച്ച് ഒരു ടീമുകളും ഏറ്റുമുട്ടിയപ്പോൾ സോസിഡാഡ് 1-0ന് ജയിച്ചിരുന്നു. അതുകൊണ്ട് തന്നെ ഇന്ന് അതിനെക്കാൾ വലിയ സ്കോറിൽ ജയിച്ചാൽ മാത്രമേ യുണൈറ്റഡിന് ഒന്നാമത് ഫിനിഷ് ചെയ്യാൻ ആവുകയുള്ളൂ. സോസിഡാഡിന് 15 പോയിന്റും യുണൈറ്റഡിനു 12 പോയിന്റുമാണ് ഉള്ളത്.
ഇന്ന് 11.15നാണ് മത്സരം നടക്കുക. മാഞ്ചസ്റ്റർ യുണൈറ്റഡ് ശക്തമായ ലൈനപ്പ് തന്നെ ഇന്ന് അണിനിരത്തും. കളി തത്സമയം സോണി നെറ്റ്വർക്കിൽ കാണാം.