യൂറോ കപ്പിനു മുമ്പായുള്ള സൗഹൃദ മത്സരത്തിൽ നോർത്ത് അയർലണ്ടിനെതിരെ ഗംഭീര വിജയം നേടി സ്പെയിൻ. ബാഴ്സലോണയുടെ യുവതാരങ്ങളുടെ മികവിൽ ഒന്നിനെതിരെ അഞ്ചു ഗോളുകളുടെ വിജയമാണ് സ്പെയിൻ നേടിയത്. ബാഴ്സലോണ താരങ്ങളായ പെഡ്രി ഇരട്ട ഗോളുകൾ നേടിയപ്പോൾ ലമിനെ യമാൽ ഇരട്ട അസിസ്റ്റ് നൽകി.
ഇന്ന് തുടക്കത്തിൽ ഒരു ഗോളിന് പിറകിൽ പോയ ശേഷം തിരിച്ചടിച്ചാണ് സ്പെയിൻ വിജയിച്ചത്. മത്സരത്തിന്റെ രണ്ടാം മിനിറ്റിൽ ബല്ലാർഡ് ആണ് നോർത്ത് അയർലണ്ടിനായി ഗോൾ നേടിയത്. പന്ത്രണ്ടാം മിനിറ്റിൽ പെട്രിയുടെ ഒരു ലോങ്ങ് റേഞ്ചറിലൂടെ സ്പെയിൻ സമനില പിടിച്ചു. പെഡ്രിയുടെ സ്പെയിനായുള്ള ആദ്യ ഗോൾ ആയിരുന്നു ഇത്.
പതിനെട്ടാം മിനിറ്റിൽ മൊറാട്ടയിലൂടെ സ്പെയിൻ ലീഡ് എടുത്തു. 29ആം മിനിട്ടിൽ വീണ്ടും പെഡ്രി വീണ്ടും സ്പെയിനായി ഗോൾ അടിച്ചു. ആദ്യ പകുതിയിൽ 3-1ന് മുന്നിൽ. രണ്ടാം പകുതിയിൽ ഫാബിയൻ റുയിസും ഒയെസബാളും കൂടെ ഗോൾ നേടിയതോടെ സ്പെയിൻ വിജയം ഉറപ്പിച്ചു. ഈ രണ്ടു ഗോളുകളും ലമിനെ യമാൽ ആയിരുന്നു ഒരുക്കിയത്. ഇനി ജൂൺ 15ന് സ്പെയിൻ യൂറോ കപ്പിൽ ക്രൊയേഷ്യയെ നേരിടും.