Category: Durand Cup

ഡ്യൂറണ്ട് കപ്പിൽ ജംഷദ്പൂർ എഫ് സിയെ ഞെട്ടിച്ച് ആർമി ഗ്രീന് വിജയം. ഇന്ന് നടന്ന ഗ്രൂപ്പ് ബിയിലെ മത്സരത്തിൽ ഒന്നിനെതിരെ മൂന്ന് ഗോളുകൾക്കാണ് ആർമി ഗ്രീൻ വിജയിച്ചത്. ദീപക് സിംഗ് ഇരട്ട ഗോളുകളുമായി ആർമി ഗ്രീനു വേണ്ടി തിളങ്ങി. 43, 48 മിനുട്ടുകളിൽ ആയിരുന്നു ദീപകിന്റെ ഗോളുകൾ. 58ആം മിനുട്ടിൽ സോചിൻ ചേത്രിയും ആർമിക്കായി ഗോൾ നേടിയത്. ജിതേന്ദ്ര സിംഗ് ആണ് ജംഷദ്പൂരിനായി ഗോൾ നേടിയത്. ആർമി ഗ്രീനിന്റെ ആദ്യ വിജയമാണിത്. ഗ്രൂപ്പ് ബിയിൽ ഇപ്പോൾ ജംഷദ്പൂർ, ആർമി ഗ്രീൻ, ഗോവ എന്നിവർ മൂന്ന് പോയിന്റുമായി നിൽക്കുകയാണ്

ഡ്യൂറണ്ട് കപ്പിൽ മൊഹമ്മദൻസ് ക്വാർട്ടർ ഫൈനലിൽ എത്തി. ഇന്ന് നടന്ന ഗ്രൂപ്പ് എയിലെ മത്സരത്തിൽ സി ആർ പി എഫിനെ നേരിട്ട മൊഹമ്മദൻസ് ഒന്നിനെതിരെ അഞ്ചു ഗോളുകൾക്കാണ് വിജയിച്ചത്. തീർത്തും ഏകപക്ഷീയമായിരുന്നു ഇന്നത്തെ മത്സരം. അസറുദ്ദീനും മാർക്കസ് ജോസഫും ഇന്ന് മൊഹമ്മദൻസിനായി ഇരട്ട ഗോളുകൾ നേടി. മാർക്കസ് ജോസഫിന് ഈ ഗോളുകളോടെ ടൂർണമെന്റിൽ മൂന്ന് ഗോളുകളായി. അസറുദ്ദീനും മൂന്ന് ഗോളുകൾ സ്കോർ ചെയ്തു കഴിഞ്ഞു. ബ്രാൻഡനും ഇന്ന് മൊഹമ്മദൻസിനായി ഗോൾ നേടി.

ഈ വിജയത്തോടെ എ ഗ്രൂപ്പിൽ നിന്ന് മൊഹമ്മദൻസും ബെംഗളൂരു യുണൈറ്റഡും ക്വാർട്ടറിലേക്ക് എത്തി. സി ആർ പി എഫും ഇന്ത്യൻ എയർ ഫോഴ്സും പുറത്തായി.

ഡ്യൂറണ്ട് കപ്പിൽ ഇന്ന് നടന്ന ഗ്രൂപ്പ് എയിൽ മത്സരത്തിൽ ബെംഗളൂരു യുണൈറ്റഡിന് വിജയം. ഇന്ത്യൻ എയർ ഫോഴ്സിനെ നേരിട്ട ബെംഗളൂരു യുണൈറ്റഡ് വലിയ വിജയം തന്നെ ഇന്ന് സ്വന്തമാക്കി. രണ്ടിനെതിരെ നാലു ഗോളുകൾക്കാണ് ബെംഗളൂരു യുണൈറ്റഡ് വിജയിച്ചത്. മാൻസി ഇരട്ട ഗോളുകളുമായി ഇന്നും ബെംഗളൂരു യുണൈറ്റഡിനായി തിളങ്ങി. യുമ്നം ഗോപിയും ഇരട്ട ഗോളുകൾ നേടി. ആദ്യ മത്സരത്തിൽ സി ആർ പി എഫിനെയും ബെംഗളൂരു പരാജയപ്പെടുത്തിയിരുന്നു.

ഗ്രൂപ്പ് ഡിയിൽ നടന്ന മത്സരത്തിൽ ആസാം റൈഫിൾസിനെ ആണ് ആർമി റെഡ് പരാജയപ്പെടുത്തിയത്. ഒന്നിനെതിരെ നാലു ഗോളുകൾക്കായിരുന്നു ആർമി റെഡിന്റെ വിജയം. ലിറ്റൺ ഷിൽ, ബികാഷ് താപ, സുശിൽ, സുരേഷ് എന്നിവരാണ് ആർമി റെഡിനായി ഗോൾ നേടിയത്

ഡ്യൂറണ്ട് കപ്പിൽ ഇന്ത്യൻ നേവിക്ക് മികച്ച വിജയം. ഗ്രൂപ്പ് സിയിൽ നടന്ന മത്സരത്തിൽ ഡെൽഹി എഫ് സിയെ നേരിട്ട ഇന്ത്യൻ നേവി ഒന്നിനെതിരെ രണ്ടു ഗോളുകൾക്കാണ് വിജയിച്ചത്. ഇന്ത്യൻ നേവിയുടെ ആദ്യ ഇലവനിൽ ആറു മലയാളി താരങ്ങൾ ഉണ്ടായിരുന്നു. ബ്രിട്ടോ, ശ്രേയസ്സ്, ഹരികൃഷണ, ജിജോ, നിഹാൽ സുധീഷ്, പ്രദീഷ് എന്നിവരാണ് ഇന്ത്യൻ നേവിക്കായി അണിനിരന്ന മലയാളി താരങ്ങൾ. ഇതിൽ ശ്രേയസ് ആണ് ഇന്ന് നേവിയുടെ ആദ്യ ഗോൾ നേടിയത്.

26ആം മിനുട്ടിൽ ആയിരുന്നു ശ്രേയസിന്റെ ഗോൾ. ഈ ഗോളിന് മുമ്പ് 21ആം മിനുട്ടിൽ ഡെൽഹി എഫ് സി വില്ലിസ് പ്ലാസയിലൂടെ ലീഡ് നേടിയിരുന്നു. രണ്ടാം പകുതിയിൽ കളി അവസാനിക്കാൻ നാലു മിനുട്ട് മാത്രം ബാക്കിയിരിക്കെ ധൽരാജ് സിങിന്റെ ഗോൾ ഇന്ത്യൻ നേവിക്ക് മൂന്ന് പോയിന്റും വിജയവും നൽകി.

ഡ്യൂറണ്ട് കപ്പിൽ എഫ് സി ഗോവക്ക് ഗംഭീര വിജയം. ഇന്ന് ഗ്രൂപ്പ് സിയിലെ ആദ്യ മത്സരത്തിൽ ആർമി ഗ്രീനെ നേരിട്ട ഗോവ എതിരില്ലാത്ത രണ്ടു ഗോളുകൾക്കാണ് വിജയിച്ചത്. യുവതാരങ്ങളുമായാണ് ഗോവ ഇന്ന് കളത്തിൽ ഇറങ്ങിയത്. 35ആം മിനുട്ടിൽ ആൽബർട് നിഗോറ ആണ് ഗോവയ്ക്ക് ലീഡ് നൽകിയത്. രണ്ടാം പകുതിയിൽ 59ആം മിനുട്ടിൽ ദേവേന്ദ്ര എഫ് സി ഗോവയുടെ വിജയം ഉറപ്പിച്ച രണ്ടാം ഗോളും നേടി.

മലയാളി താരം ക്രിസ്റ്റി ഡേവിസ് ഇന്ന് ഗോവയുടെ ആദ്യ ഇലവനിൽ ഉണ്ടായുരുന്നു. രണ്ടാം പകുതിയിൽ മലയാളി താരം നെമിൽ സബ്ബായി എത്തി ഗോവയ്ക്കായി മികച്ച പ്രകടനം കാഴ്ചവെച്ചു. ഡ്യൂറണ്ട് കപ്പിൽ നാളെ നടക്കുന്ന മത്സരത്തിൽ ഡെൽഹി എഫ് സി ഇന്ത്യൻ നേവിയെ നേരിടും.

ഡ്യൂറണ്ട് കപ്പിലെ ആദ്യ മത്സരത്തിൽ ജംഷദ്പൂർ എഫ് സിക്ക് വിജയം. ഇന്ന് ഗ്രൂപ്പ് ബിയിലെ ആദ്യ മത്സരത്തിൽ ഐലീഗ് ക്ലബായ സുദേവയെ നേരിട്ട ജംഷദ്പൂർ എതിരില്ലാത്ത ഒരു ഗോളിനാണ് വിജയിച്ചത്. മത്സരത്തിന്റെ 34ആം മിനുട്ടിൽ ലാലറുവത് മാവിയ ആണ് ജംഷദ്പൂരിന് ലീഡ് നൽകിയത്. മികച്ച രീതിയിൽ കളിച്ച് ആ ഒരൊറ്റ ഗോളിന് തന്നെ വിജയം ഉറപ്പിക്കാൻ ജംഷസ്പൂരിനായി. യുവതാരങ്ങളുമായായിരുന്നു ജംഷസ്പൂർ ഇറങ്ങിയത്. അവരുടെ സീനിയർ സ്ക്വാഡിലെ താരങ്ങളിൽ ഭൂരിഭാഗവും ഡ്യൂറണ്ട് കപ്പിൽ പങ്കെടുക്കുന്നില്ല.

ഇന്ന് ഗ്രൂപ്പ് എയിൽ നടന്ന മത്സരത്തിൽ ബെംഗളൂരു യുണൈറ്റഡ് സി ആർ പി എഫിനെ പരാജയപ്പെടുത്തി. എതിരില്ലാത്ത ഒരു ഗോളിനായിരുന്നു വിജയം. 62ആം മിനുട്ടിൽ പെഡ്രോ ഹാവിയർ ആണ് ബെംഗളൂരു യുണൈറ്റഡിനായി വിജയ ഗോൾ നേടിയത്.

ഡ്യൂറണ്ട് കപ്പിനായി പ്രത്യേക ജേഴ്സി പുറത്തിറക്കി ഇരിക്കുകയാണ് എഫ് സി ഗോവ. കറുത്ത നിറത്തിലുള്ള ജേഴ്സി പ്രമുഖ സ്പോർട്സ് വിയർ ബ്രാൻഡായ റയുർ സ്പോർട്സ് ആണ് ഡിസൈൻ ചെയ്തിരിക്കുന്നത്. ഗോവ സംസ്ഥാനത്തിന്റെ ഭൂപടവും ജേഴ്സിയിൽ ഉണ്ട്. എഫ് സി ഗോവയുടെ വെബ്സൈറ്റിൽ കിറ്റ് ലഭ്യമാണ്. മുതിർന്നവരുടെ ജേഴ്സിക്ക് 999 രൂപയും കുട്ടികളുടെ ജേഴ്സിക്ക് 699 രൂപയുമാണ് വില. ജംഷദ്പൂർ, സുദേവ ആർമി ടീം എന്നിവർക്ക് ഒപ്പം ഗ്രൂപ്പ് ബിയിലാണ് എഫ് സി ഗോവ ഡ്യൂറണ്ട് കപ്പിൽ ഇറങ്ങുന്നത്.

ഡ്യൂറണ്ട് കപ്പിന്റെ ഉദ്ഘാടന മത്സരത്തിൽ മൊഹമ്മദൻസിന് വൻ വിജയം. ഇന്ന് കൊൽക്കത്തയിൽ നടന്ന ഗ്രൂപ്പ് എയിലെ പോരാട്ടത്തിൽ ഇന്ത്യൻ എയർ ഫോഴ്സിനെ നേരിട്ട മൊഹമ്മദൻസ് ഒന്നിനെതിരെ നാലു ഗോളുകളുടെ വലിയ വിജയം തന്നെ നേടി. തികച്ചും ഏകപക്ഷീയമായിരുന്നു ഐലീഗ് ക്ലബിന്റെ ഇന്നത്തെ പ്രകനം. ആദ്യ പകുതിയിൽ തന്നെ മൂന്ന് ഗോളുകൾ നേടാൻ മൊഹമ്മദൻസിനായി. 19ആം മിനുട്ടിൽ മിലൻ സിങാണ് മൊഹമ്മദൻസിന് ആദ്യ ലീഡ് നൽകിയത്. പിന്നാലെ 31ആം മിനുട്ടിൽ അർജീത് ലീഡ് ഇരട്ടിയാക്കി.

ഹാഫ് ടൈമിന് തൊട്ടു മുമ്പ് അസറുദ്ദീൻ ബ്ലാക്ക് പാന്തേഴ്സിന്റെ മൂന്നാം ഗോളും നേടി. 77ആം മിനുട്ടിൽ മുൻ ഗോകുലം കേരള താരം മാർക്കസ് ജോസഫിന്റെ വക ആയിരുന്നു ഗോൾ‌. സൗരവ് ആണ് എയർ ഫോഴ്സിന്റെ ആശ്വാസ ഗോൾ നേടിയത്‌‌. നാളെ നടക്കുന്ന മത്സരത്തിൽ ജംഷദ്പൂർ എഫ് സി സുദേവയെയും ബെംഗളൂരു യുണൈറ്റഡ് സി ആർ പി എഫിനെയും നേരിടും.

ഏഷ്യയിലെ ഏറ്റവും പഴയ ഫുട്ബോൾ ടൂർണമെന്റ് ആയ ഡ്യൂറാൻഡ് കപ്പ് അടുത്ത അഞ്ച് വർഷവും കൊൽക്കത്തയിൽ തന്നെ നടക്കുമെന്ന് ഇന്ത്യൻ ആർമിയുടെ ഈസ്റ്റേൺ കമാൻഡ് ചീഫ് ലെഫ്റ്റനന്റ് ജനറൽ കെ കെ റെപ്സ്വാൾ അറിയിച്ചു. ടൂർണമെന്റിന്റെ 130 -ാമത് എഡിഷൻ ഞായറാഴ്ച മുതൽ കൊൽക്കത്തയിൽ നടക്കാൻ ഇരിക്കെ ആണ്. അതിനു മുന്നോടിയായ വാർത്ത സമ്മേളനത്തിൽ ആണ് ടൂർണമെന്റ് ഇനി കൊൽക്കത്തയിലാകും നടക്കുക എന്ന് അധികൃതർ അറിയിച്ചത്.

2019ൽ ആണ് ടൂർണമെന്റ് സ്ഥിരമായി നടന്നു കൊണ്ടിരുന്ന ന്യൂഡൽഹിയിൽ നിന്ന് മാറി കൊൽക്കത്തയിലേക്ക് എത്തിയത്‌. “കഴിഞ്ഞ തവണ കൊൽക്കത്തയിൽ ടൂർണമെന്റ് നടത്തിയപ്പോൾ ഉള്ള പ്രതികരണം ഞങ്ങളെ അതിശയിപ്പിച്ചു, അതിനാലാൺ അടുത്ത അഞ്ച് വർഷത്തേക്ക് ടൂർണമെന്റ് ഇവിടെ നടത്താൻ കമ്മിറ്റി തീരുമാനിച്ചത്,” ഡ്യുറാൻഡ് കപ്പിന്റെ ചെയർമാൻ കൂടിയായ റിപ്സ്വാൾ പറഞ്ഞു.