ഗംഭീര തിരിച്ചുവരവുമായി ബാഴ്സലോണ, സെവിയ്യയെ തകർത്ത് കോപ ഡെൽ റേ ഫൈനലിൽ

20210304 035834
- Advertisement -

ബാഴ്സലോണയെ എഴുതി തള്ളിയർക്ക് ക്ലാസിക് തിരിച്ചുവരവിലൂടെ മറുപടി നൽകി കോമാനും സംഘവും. ഇന്ന് ക്യാമ്പ്നുവിൽ നടന്ന കോപ ഡെൽ റേ സെമി ഫൈനലിന്റെ രണ്ടാം പാദത്തിൽ അത്ര വലിയ തിരിച്ചുവരവാണ് ബാഴ്സലോണ നടത്തിയത്. സെവിയ്യയോട് ആദ്യ പാദത്തിൽ വഴങ്ങിയ 2-0ന്റെ പരാജയം മറികടന്ന് ഇന്ന് 3-0ന്റെ വിജയവുമായി ബാഴ്സലോണ കോപ ഡെൽ റേ ഫൈനലിലേക്ക് കടന്നു.

ഇന്ന് തുടക്കം മുതൽ ആക്രമിച്ചു കളിച്ച ബാഴ്സലോണ സെവിയ്യയെ നിലം തൊടാൻ അനുവദിച്ചില്ല. 12ആം മിനുട്ടിൽ ഡെംബലെയിലൂടെ ആയിരുന്നു ബാഴ്സലോണയുടെ ആദ്യ ഗോൾ. ഇതിനു ശേഷം ബാഴ്സലോയുടെ പല ശ്രമങ്ങളും ലക്ഷ്യം കാണാതെ പോയി. ഇതിനിടയിൽ ആണ് രണ്ടാം പകുതിയിൽ സെവിയ്യക്ക് പെനാൾട്ടി ലഭിക്കുന്നത്‌. കളി കൈവിട്ടെന്ന് ബാഴ്സലോണ കരുതിയ നിമിഷം. എന്നാൽ രക്ഷകനായ് ടെർസ്റ്റേഗൻ എത്തി. പെനാൾട്ടി രക്ഷിച്ച് സെവിയ്യയുടെ ഗോൾ തടഞ്ഞു.

കളിയുടെ 94ആം മിനുട്ടിൽ ആണ് ബാഴ്സലോണ നിർണായകമായ രണ്ടാം ഗോൾ നേടുന്നത്. പികെ നേടിയ ഗോളൊടെ അഗ്രിഗേറ്റ് സ്കോർ 2-2 എന്നായി. തുടർന്ന് കളി എക്സ്ട്രാ ടൈമിലേക്ക് നീങ്ങി. ഇഞ്ച്വറി ടൈമിൽ സെവിയ്യ താരം ഫെർണാണ്ടോ ചുവപ്പ് കണ്ട് പുറത്തുപോയതോടെ സെവിയ്യയുടെ കാര്യങ്ങൾ പ്രശ്നത്തിലായി. എക്സ്ട്രാ ടൈമിൽ ബ്രെത്വൈറ്റ് ബാഴ്സലോണക്ക് മൂന്നാം ഗോളും ഒപ്പം അഗ്രിഗേറ്റിൽ 3-2ന്റെ ലീഡും നൽകി. ഫൈനൽ ഉറപ്പിക്കാൻ ബാഴ്സലോണക്ക് ആയി.

Advertisement