സൂപ്പർ ലീഗിനെ കുറിച്ചുള്ള തന്റെ അഭിപ്രായത്തിൽ മാറ്റം വന്നിട്ടില്ലെന്ന് യർഗൻ ക്ലോപ്പ്

Staff Reporter

Download the Fanport app now!
Appstore Badge
Google Play Badge 1

യൂറോപ്പിലെ വമ്പൻ ക്ലബ്ബുകൾ തുടങ്ങിയ യൂറോപ്യൻ സൂപ്പർ ലീഗിനെ കുറിച്ചുള്ള തന്റെ അഭിപ്രായത്തിൽ മാറ്റം വന്നിട്ടില്ലെന്ന് ലിവർപൂൾ പരിശീലകൻ യർഗൻ ക്ലോപ്പ്. നേരത്തെ 2019ൽ ലിവർപൂൾ പരിശീലകനായ ക്ലോപ്പ് സൂപ്പർ ലീഗിനെതിരെ സംസാരിച്ചിരുന്നു. എന്നാൽ കഴിഞ്ഞ ദിവസം ക്ലോപ്പിന്റെ ക്ലബായ ലിവർപൂൾ അടക്കം യൂറോപ്യൻ സൂപ്പർ ലീഗിൽ ചേർന്നിട്ടും തന്റെ അഭിപ്രായം പഴയത് തന്നെയാണെന്ന് ക്ലോപ്പ് പറഞ്ഞു.

2019ലാണ് സൂപ്പർ ലീഗിനെതിരെ അഭിപ്രായവുമായി ക്ലോപ്പ് രംഗത്തെത്തിയത്. സൂപ്പർ ലീഗ് ഒരിക്കലും നാടക്കരുതെന്നാണ് തന്റെ ആഗ്രഹമെന്നും ചാമ്പ്യൻസ് ലീഗും യൂറോപ്പ ലീഗും മികച്ച രീതിയിലാണ് മുൻപോട്ട് പോവുന്നതെന്നും ക്ലോപ്പ് പറഞ്ഞിരുന്നു. തനിക്ക് ചാമ്പ്യൻസ് ലീഗ് ആണ് സൂപ്പർ ലീഗ് എന്നും ഓരോ വർഷവും വിത്യസ്ത ടീമുകളെ എതിരാളികളായി ചാമ്പ്യൻസ് ലീഗിൽ ലഭിക്കുമെന്നും ക്ലോപ്പ് പറഞ്ഞിരുന്നു. 10 വർഷം തുടർച്ചയായി ലിവർപൂൾ റയൽ മാഡ്രിഡിനെ നേരിടുന്നത് കാണാൻ ആരും ആഗ്രഹിക്കുന്നില്ലെന്നും ക്ലോപ്പ് പറഞ്ഞു.

കഴിഞ്ഞ ദിവസമാണ് ഇംഗ്ലണ്ടിൽ നിന്നുള്ള 6 ടീമുകൾ അടക്കം ചാമ്പ്യൻസ് ലീഗിന് ബദലായി യൂറോപ്യൻ സൂപ്പർ ലീഗിലേക്ക് പോവുകയാണെന്ന് പ്രഖ്യാപിച്ചത്. എന്നാൽ ഇതിനെതിരെ ഫുട്ബോൾ ആരാധകരുടെ ഭാഗത്ത് നിന്ന് കടുത്ത പ്രതിഷേധമാണ് ഉയരുന്നത്.