ചാമ്പ്യൻസ് ലീഗ് സെമിയിൽ മിലാൻ ഡർബി ഉറപ്പായി

ചാമ്പ്യൻസ് ലീഗ് സെമി ഫൈനലിൽ ഇത്തവണ മിലാൻ ഡർബി കാണാം. ഇന്ന് ക്വാർട്ടർ ഫൈനലിന്റെ രണ്ടാം പാദത്തിൽ ഇന്റർ മിലാൻ ബെൻഫികയോട് സമനില വഴങ്ങി എങ്കിലും അവർ സെമി ഫൈനൽ ഉറപ്പിച്ചു. ആദ്യ പാദത്തിൽ 2-0ന് ജയിച്ച ഇന്റർ മിലൻ ഇന്ന് 3-3 എന്ന സമനിലയാണ് വഴങ്ങിയത്. അഗ്രിഗേറ്റ് സ്കോർ 5-3

ഇന്ന് ആദ്യ പകുതിയിൽ 12ആം മിനുട്ടിൽ ബരെലയിലൂടെ ഇന്റർ ലീഡ് എടുത്തു. ലൗട്ടാരോയുടെ പാസിൽ നിന്ന് ആണ് ബരെല ഗോൾ നേടിയത്. ആദ്യ പാദത്തിലും ബരെല ഗോൾ നേടിയിരുന്നു. 38ആം മിനുട്ടിൽ ഓർസ്നസിന്റെ ഗോളിലൂടെ ബെൻഫിക സമനില കണ്ടെത്തി. ആദ്യ പകുതി 1-1 എന്ന് അവസാനിച്ചു. രണ്ടാം പകുതിയിൽ 65ആം മിനുട്ടിൽ ലൗട്ടാരോ മാർട്ടിനസ് ഇന്ററിന് അവരുടെ തിരികെ നേടിക്കൊടുത്തു. സ്കോർ 2-1. അഗ്രിഗേറ്റ് സ്കോർ 4-1.

ഇതിനു ശേഷം സബ്ബായി എത്തിയ കൊറേയയും ഇന്ററിനായി ഗോൾ നേടി. സ്കോർ 3-1(5-1). 86ആം മിനുട്ടിൽ അന്റോണിയോ സിൽവയുടെ ഗോൾ ബെൻഫികയ്ക്ക് ചെറിയ ആശ്വാസം നൽകി. 3-2 (5-2). വീണ്ടും പൊരുതിയ ബെൻഫിക ഇഞ്ച്വറി ടൈമിൽ സമനില ഗോളും കണ്ടെത്തി. മുസ ആയിരുന്നു ഗോൾ നേടിയത്.

ഇനി സെമി ഫൈനലിൽ എ സി മിലാനെ ആകും ഇന്റർ മിലൻ നേരിടുക. കഴിഞ്ഞ ദിവസം നാപോളിയെ മറികടന്നായിരുന്നു എ സി മിലാൻ സെമി ഫൈനൽ ഉറപ്പിച്ചത്.