ഇന്നലെ ചാമ്പ്യൻസ് ലീഗിൽ ഏറ്റ പരാജയം വളരെ നിരാശ നൽകുന്നതാണ് എന്ന് ടോട്ടൻഹാം പരിശീലകൻ പോചടീനോ. ഇന്നലെ സ്വന്തം ഗ്രൗണ്ടിൽ വെച്ച് 7-2ന്റെ പരാജയമാണ് സ്പർസ് നേരിട്ടത്. ചാമ്പ്യൻസ് ലീഗ് ചരിത്രത്തിലെ ഒരു ഇംഗ്ലീഷ് ടീമിന്റെ ഏറ്റവും വലിയ പരാജയമായിരുന്നു ഇത്. ഈ തോൽവി നിരാശ നൽകുന്നതാണെന്നും ഇത് മറികടക്കാൻ ടീം ഇപ്പോൾ ഒറ്റക്കെട്ടായി നിൽക്കുകയാണ് വേണ്ടതെന്നും പോചടീനോ പറഞ്ഞു.
ടോട്ടൻഹാമിനു ബയേണിനും ഇന്നലെ ഒരേ പോലെയാണ് അവസരങ്ങൾ ലഭിച്ചത് എന്നും ബയേൺ ക്ലിനിക്കൽ ആയത് കൊണ്ടാണ് ഇത്ര ഗോൾ വീണത് എന്നും പൊചടീനോ പറഞ്ഞു. കളിയുടെ 83ആം മിനുട്ട് വരെ ടോട്ടൻഹാമും കളിയിൽ ഉണ്ടായിരുന്നു എന്നും പിന്നീട് ടീം കളി കൈവിട്ടെന്നും പോചടീനോ പറഞ്ഞു. ഈ സീസണെ വളരെ മോശം രീതിയിൽ തുടങ്ങിയ സ്പർസ് പരിശീലകനു മേൽ ഇപ്പോൾ വലിയ സമ്മർദ്ദമാണ് ഉള്ളത്.
