Category: Bundesliga

ജർമ്മൻ ബുണ്ടസ് ലീഗയിൽ സ്റ്റുഗാർട്ടിനെ എതിരില്ലാത്ത അഞ്ചു ഗോളുകൾക്ക് തകർത്തു ബൊറൂസിയ ഡോർട്ട്മുണ്ട്. ജയത്തോടെ അവർ നാലാം സ്ഥാനത്തേക്ക് ഉയർന്നപ്പോൾ സ്റ്റുഗാർട്ട് 16 സ്ഥാനത്തേക്ക് വീണു. യുവതാരങ്ങൾ ആണ് ഡോർട്ട്മുണ്ടിന് വലിയ ജയം ഒരുക്കിയത്. വലിയ ഡോർട്ട്മുണ്ട് ആധിപത്യം കണ്ട മത്സരത്തിൽ രണ്ടാം മിനിറ്റിൽ തന്നെ അവർ മുന്നിലെത്തി. നികാളസ് സുലെയുടെ പാസിൽ നിന്നു ജൂഡ് ബെല്ലിങ്ഹാം ആണ് അവർക്ക് ആയി ഗോൾ നേടിയത്, ജനുവരിക്ക് ശേഷമുള്ള യുവതാരത്തിന്റെ ആദ്യ ലീഗ് ഗോൾ ആയിരുന്നു ഇത്. 13 മത്തെ മിനിറ്റിൽ റാഫേൽ ഗുയിയേരയുടെ പാസിൽ നിന്നു സുലെ ഡോർട്ട്മുണ്ടിന് രണ്ടാം ഗോൾ സമ്മാനിച്ചു.

ആദ്യ പകുതിക്ക് തൊട്ടു മുമ്പ് യൂസഫോ മൗകോകയുടെ പാസിൽ നിന്നു ജിയോവാണി റെയ്ന ഡോർട്ട്മുണ്ടിന് മൂന്നാം ഗോളും നേടി നൽകി. രണ്ടാം പകുതിയിൽ 53 മത്തെ മിനിറ്റിൽ തന്റെ രണ്ടാം ഗോൾ കണ്ടത്തിയ ബെല്ലിങ്ഹാം ഡോർട്ട്മുണ്ടിന്റെ വലിയ ജയം ഉറപ്പിച്ചു. നികോ സ്‌കളോറ്റർബെക്കിന്റെ പാസിൽ നിന്നായിരുന്നു ഇംഗ്ലീഷ് യുവതാരം തന്റെ രണ്ടാം ഗോൾ നേടിയത്. 73 മത്തെ മിനിറ്റിൽ റാഫേൽ ഗുയിയേരയുടെ പാസിൽ നിന്നു ഗോൾ നേടിയ യൂസഫോ മൗകോകയാണ് ഡോർട്ട്മുണ്ടിന്റെ വലിയ ജയം പൂർത്തിയാക്കിയത്. അവസാന നിമിഷം നികോ ഫെയിഫർ സ്റ്റുഗാർട്ടിനു ആയി ആശ്വാസഗോൾ നേടിയെങ്കിലും വാർ അത് ഓഫ് സൈഡ് ആണെന്നി കണ്ടത്തുക ആയിരുന്നു.

ജർമ്മൻ ബുണ്ടസ് ലീഗയിൽ ജയം തുടർന്ന് ബയേൺ മ്യൂണിക്. ആറാം സ്ഥാനക്കാരായ ഹോഫൻഹെയിമിനെ എതിരില്ലാത്ത രണ്ടു ഗോളുകൾക്ക് മറികടന്ന ബയേൺ ഒന്നാം സ്ഥാനക്കാരായ യൂണിയൻ ബെർലിനും ആയുള്ള അകലവും കുറച്ചു. സീസണിൽ ഉഗ്രൻ ഫോമിലുള്ള യുവതാരം ജമാൽ മുസിയാല തിളങ്ങിയ മത്സരം ആയിരുന്നു ഇത്.

ബയേണിന്റെ ആധിപത്യം കണ്ട മത്സരത്തിൽ 17 മത്തെ മിനിറ്റിൽ ബോക്‌സിൽ ലഭിച്ച അവസരം ലക്ഷ്യത്തിൽ എത്തിച്ച ജമാൽ മുസിയാലയാണ് ബയേണിനു മുൻതൂക്കം നൽകിയത്. സീസണിൽ 16 കളികളിൽ നിന്നു താരത്തിന്റെ ഒമ്പതാം ഗോൾ ആയിരുന്നു ഇത്. 38 മത്തെ മിനിറ്റിൽ സെർജ് ഗനാബ്രിയുടെ ക്രോസ് ലക്ഷ്യത്തിൽ എത്തിച്ച എറിക് ചുപോ മോട്ടിങ് ബയേണിന്റെ ജയം ഉറപ്പിക്കുക ആയിരുന്നു.

ജർമ്മൻ ബുണ്ടസ് ലീഗയിൽ ബയേർ ലെവർകുസനെ ഒന്നിനെതിരെ നാലു ഗോളുകൾക്ക് തകർത്തു ഫ്രാങ്ക്ഫർട്ട്. ജയത്തോടെ അവർ നാലാം സ്ഥാനത്തേക്ക് ഉയർന്നപ്പോൾ ലെവർകുസൻ 16 സ്ഥാനത്തേക്ക് പിന്തള്ളപ്പെട്ടു. ആദ്യ പകുതിയിൽ ഇഞ്ച്വറി സമയത്ത് ദയിച്ചി കമാഡ പെനാൽട്ടിയിലൂടെ ഫ്രാങ്ക്ഫർട്ടിനു ആദ്യ ഗോൾ സമ്മാനിച്ചു. രണ്ടാം പകുതിയിൽ ഗോൾ മഴ ആണ് പിന്നീട് കണ്ടത്.

രണ്ടാം പകുതിയിൽ പിയെരോ ഹിൻകാപിയിലൂടെ 56 മത്തെ മിനിറ്റിൽ ലെവർകുസൻ സമനില പിടിച്ചു. രണ്ടു മിനിറ്റിനുള്ളിൽ റാണ്ടാൽ കൊളോ മുവാനിയിലൂടെ ഫ്രാങ്ക്ഫർട്ട് മുൻതൂക്കം തിരിച്ചു പിടിച്ചു. ജെസ്പർ ലിന്റസ്‌ട്രോം,ലൂകാസ് അലാറിയോ എന്നിവർക്ക് ഒപ്പം ഒരിക്കൽ കൂടി കമാഡ പെനാൽട്ടിയിലൂടെ ഗോൾ നേടിയപ്പോൾ ഫ്രാങ്ക്ഫർട്ട് വലിയ ജയം കരസ്ഥമാക്കി. പിയെരോ ഹിൻകാപിക്ക് ചുവപ്പ് കാർഡ് കണ്ടത് ലെവർകുസനു വലിയ തിരിച്ചടിയായി.

സ്പാനിഷ് ഇതിഹാസം സാബി അലോൺസോ ബയേർ ലെവർകൂസന്റെ പുതിയ പരിശീലകനാവും. ചാമ്പ്യൻസ് ലീഗിലെ പോർട്ടോക്കെതിരായ 2-0 പരാജയത്തിന് ശേഷം ബയേർ പരിശീലകൻ ജെറാർഡോ സിയോനിയെ പുറത്താക്കിയിരുന്നു. 16 ഗോളുകൾ വഴങ്ങി ബുണ്ടസ് ലീഗയിൽ 17ആം സ്ഥാനത്താണ് ബയേർ ലെവർകൂസൻ. മുൻ റയൽ മാഡ്രിഡ്, ബയേൺ മ്യൂണിക്ക് താരമായ സാബി അലോൺസോ ആദ്യമായാണ് ഒരു സീനിയർ ടീമിന്റെ പരിശീലകനാവുന്നത്.

ഇതിന് മുൻപ് റയൽ മാഡ്രിഡ് യൂത്ത് ടീമിന്റെയും റയൽ സോസിദാദ് ബി ടീമിന്റെയും പരിശീലകനായിരുന്നു. മുൻ ചെൽസി പരിശീലകൻ തോമസ് ടൂഷലിന്റെ പേരായിരുന്നു ബയേർ ലെവർകൂസന്റെ പരിശീലകനായി ഉയർന്ന് കേട്ടത്. ടൂഷൽ പരിശീലക സ്ഥാനം നിരസിച്ചതിനെ തുടർന്നാണ് സാബി അലോൺസോ ബയേർ ലെവർകൂസൻ പരിശീലകനാവുന്നത് എന്നാണ് ജർമ്മനിയിൽ നിന്നുള്ള റിപ്പോർട്ടുകൾ.

ആർബി ലെപ്സിഗിന്റെ ഓസ്ട്രിയൻ താരം കോണ്രാഡ് ലെയ്മറിന് വേണ്ടിയുള്ള പ്രതീക്ഷകൾ അവസാനിപ്പിക്കാതെ ബയേൺ മ്യൂണിച്ച്. ഈ ട്രാൻസ്ഫർ വിൻഡോയിലെ പ്രധാന ലക്ഷ്യങ്ങളിൽ ഒന്നായിരുന്നെങ്കിലും ഇരുപത്തഞ്ചുകാരനെ ടീമിൽ എത്തിക്കാൻ ബയേണിനായിരുന്നില്ല. ലെയ്മർ സമ്മതം മൂളിയിരുന്നെങ്കിലും ലെപ്സിഗുമായി ധാരണയിൽ എത്താൻ സാധിക്കാതെ വന്നതോടെയാണ് കൈമാറ്റം സാധ്യമാകാതെ പോയത്. എന്നാൽ ഓസ്ട്രിയൻ താരത്തിന് വേണ്ടിയുള്ള ശ്രമങ്ങൾ അവസാനിപ്പിക്കാൻ ഒരുക്കമല്ലെന്ന സൂചനയാണ് ഫാബ്രിസിയോ റോമാനോ നൽകുന്നത്.

ടീമുമായുള്ള തന്റെ കരാറിന്റെ അവസാന വർഷത്തിലാണ് താരമുള്ളത്. 2023ഓടെ ഫ്രീ ഏജന്റ് ആവുന്ന ലെയ്മറിനെ ടീമിൽ എത്തിക്കാൻ സാധിക്കുമെന്നാണ് ബയേൺ കണക്ക് കൂട്ടുന്നത്. താരവും തന്റെ ഭാവി തട്ടകമായി ബയേണിനെ തന്നെയാണ് കാണുന്നത്. ബയേൺ കോച്ച് നെഗെൽസ്മാനാകട്ടെ കഴിഞ്ഞ വർഷം മുതൽ ലെയ്മറിനെ സ്വന്തം സംഘത്തിന്റെ ഭാഗമാക്കാനുള്ള നീക്കത്തിലുമായിരുന്നു. ഏതായാലും അടുത്ത സീസണോടെ തന്നെ ഇത് സംഭവിച്ചേക്കും.