കഴിഞ്ഞയാഴ്ച പുറത്താക്കപ്പെട്ട നൂറി സാഹിന് പകരം, മുൻ ബയേൺ മ്യൂണിക്ക് പരിശീലകൻ നിക്കോ കൊവാചിനെ ബൊറൂസിയ ഡോർട്മുണ്ട് പരിശീലകനായി നിയമിക്കും. 2026 വരെ നീണ്ടു നിൽക്കുന്ന കരാറിൽ ആകും കൊവാച് എത്തുന്നത്. ഷക്തർ ഡൊണെറ്റ്സ്കിനെതിരെ ഡോർട്ട്മുണ്ടിന്റെ 3-1 ചാമ്പ്യൻസ് ലീഗ് വിജയത്തിന് ശേഷം സ്പോർട്ടിംഗ് ഡയറക്ടർ ലാർസ് റിക്കൻ ഈ വാർത്ത സ്ഥിരീകരിച്ചു.
കോവാക് ഔദ്യോഗികമായി ചുമതലയേൽക്കുന്നതിന് മുമ്പ്, ഹൈഡൻഹൈമിനെതിരായ ബുണ്ടസ്ലിഗ മത്സരത്തിൽ ഇടക്കാല പരിശീലകൻ മൈക്ക് ടൾബർഗ് ടീമിനെ നയിക്കും. അവസാനമായി വോൾഫ്സ്ബർഗിനെ പരിശീലിപ്പിച്ച 53 കാരനായ കൊവാച്, 2018-19 ൽ ബയേൺ മ്യൂണിക്കിനൊപ്പം ബുണ്ടസ്ലിഗയും ഡിഎഫ്ബി പോകലും നേടിയിരുന്നു.
കഴിഞ്ഞ എട്ട് ബുണ്ടസ്ലിഗ മത്സരങ്ങളിൽ ഒന്ന് മാത്രം വിജയിച്ച പട്ടികയിൽ 11-ാം സ്ഥാനത്തുള്ള ഡോർട്ട്മുണ്ടിനെ ഫോമിലേക്ക് കൊണ്ടുവരികയാകും കൊവാചിന്റെ ദൗത്യം.