തിങ്കളാഴ്ച വൂൾഫ്സ്ബർഗിനെതിരായ ആഴ്സണലിന്റെ വനിതാ ചാമ്പ്യൻസ് ലീഗ് സെമി ഫൈനൽ രണ്ടാം പാദത്തിനായുള്ള എമിറേറ്റ്സ് സ്റ്റേഡിയത്തിലെ മുഴുവൻ ടിക്കറ്റുകളും വിറ്റു തീർന്നു. ഇംഗ്ലണ്ടിലെ ഒരു വനിതാ ക്ലബ് മത്സരത്തിന്റെ റെക്കോഡ് കാണികളാകും ഇത്. 60,000-ത്തിലധികം ടിക്കറ്റുകൾ ആണ് വിറ്റുപോയത്.
എമിറേറ്റ്സിലെ ആഴ്സണലിന്റെ മുൻ റെക്കോർഡ് ഇതോടെ തകരും. ഈ സീസണിന്റെ തുടക്കത്തിൽ നോർത്ത് ലണ്ടൻ ഡാർബിയിൽ 47,367 കാണികൾ മത്സരം കാണാൻ എത്തിയിരുന്നു. അന്ന് വനിതാ സൂപ്പർ ലീഗിലെ മത്സരത്തിൽ ആഴ്സണൽ സ്പർസിനെ 4-0ന് തോല്പ്പിച്ചു. ജർമ്മനിയിൽ നടന്ന ആദ്യ പാദ സെമി ഫൈനൽ 2-2ന് സമനിലയിൽ പിരിഞ്ഞതിനാൽ ഇപ്പോഴും ആഴ്സണലിന് ഫൈനൽ പ്രതീക്ഷ ഉണ്ട്. 2007-ന് ശേഷമുള്ള ആദ്യ ചാമ്പ്യൻസ് ലീഗ് ഫൈനൽ ആണ് ആഴ്സണലിന്റെ ലക്ഷ്യം.