മാഞ്ചസ്റ്റർ യുണൈറ്റഡ് പരിശീലകനായി റൂബൻ അമോറിം ചുമതലയേറ്റു. ഇന്ന് അദ്ദേഹം മാഞ്ചസ്റ്റർ യുണൈറ്റഡിൽ എത്തി തന്റെ ജോലി ഔദ്യോഗികമായി ആരംഭിച്ചു. നേരത്തെ തന്നെ യുണൈറ്റഡ് അമോറിമിനെ പരിശീലകനായി പ്രഖ്യാപിച്ചിരുന്നു എങ്കിലും നവംബർ 11ന് മാത്രമേ ഔദ്യോഗിക ചുമതലയേറ്റെടുക്കൂ എന്ന് പറഞ്ഞിരുന്നു.
2027 ജൂൺ വരെയുള്ള കരാറിൽ ആണ് പോർച്ചുഗീസ് പരിശീലകൻ എത്തുന്നത്. ഒരു അധിക വർഷത്തേക്കുള്ള ഓപ്ഷനുമുണ്ട്. യൂറോപ്പിലെ ഏറ്റവും മികച്ച യുവ പരിശീലകരിൽ ഒരാളായി കണക്കാക്കപ്പെടുന്ന അമോറിം ഇന്ന് കാരിങ്ടണിൽ എത്തി യുണൈറ്റഡ് സി ഇ ഒയെ ഉൾപ്പെടെയുള്ളവരെ കണ്ടു.
39 കാരനായ പോർച്ചുഗീസ് മാനേജർ സ്പോർട്ടിംഗിനെ രണ്ട് പ്രൈമിറ ലിഗ കിരീടങ്ങൾ ഉൾപ്പെടെ സുപ്രധാന വിജയങ്ങളിലേക്ക് നയിച്ചിട്ടുണ്ട്. 19 വർഷത്തിനിടെ അവരുടെ ആദ്യ ലീഗ് കിരീടം അദ്ദേഹം നേടിക്കൊടുത്തു. നവംബർ 24 ന് ഇപ്സ്വിച്ച് ടൗണിനെതിരെ യുണൈറ്റഡുമായുള്ള പ്രീമിയർ ലീഗ് മത്സരത്തിൽ ആകും അമോറിം ആദ്യമായി ചുമതല ഏറ്റെടുക്കുക.
അതുവരെയുള്ള ഇടക്കാലത്തേക്ക് റൂഡ് വാൻ നിസ്റ്റൽറൂയ് മാനേജരായി തുടരും. അമോറിം മുമ്പ് ജോസ് മൗറീഞ്ഞോക്ക് കീഴിൽ ഇൻ്റേൺഷിപ്പ് ചെയ്യുമ്പോൾ മാഞ്ചസ്റ്റർ യുണൈറ്റഡിൽ പ്രവർത്തിച്ചിരുന്നു.