റൊണാൾഡോയുടെയും അൽ നസറിന്റെയും സൗദി ലീഗ് പ്രതീക്ഷകൾ അസ്തമിച്ചു. സൗദി ലീഗ് കിരീടം അൽ ഹിലാൽ സ്വന്തമാക്കി. ഇന്ന് അൽ ഹസാമിനെതിരെ നടന്ന മത്സരത്തിൽ ഒന്നിനെതിരെ നാലു ഗോളുകൾക്ക് വിജയിച്ചതോടെയാണ് അൽ ഹിലാൽ കിരീടം ഉറപ്പിച്ചത്. ലീഗിൽ ഇനിയും മൂന്നു മത്സരങ്ങൾ ശേഷിക്കുകയാണ് അവർ കിരീടം ഉറപ്പിച്ചത്.
ഇന്ന് ഹിലാലിനു വേണ്ടി മിട്രോവിച് ഇരട്ട ഗോളുകളും മിലിങ്കോവിച് സാവിച് ഒരു ഗോളും നേടി. ഒരു സെൽഫ് ഗോളും ഉണ്ടായിരുന്നു. സീസണിൽ ഒരു മത്സരം പോലും പരാജയപ്പെടാതെയാണ് അൽഹിലാൽ കിരീടത്തിലേക്ക് എത്തിയത്. 31 മത്സരങ്ങളിൽ നിന്ന് 89 പോയിന്റാണ് അവർക്ക് ഉള്ളത്. റൊണാൾഡോയുടെ അൽ നസർ 77 പോയിന്റുമായി രണ്ടാമത് നിൽക്കുകയാണ്. അവർ ശേഷിക്കുന്ന മൂന്ന് മത്സരങ്ങൾ ജയിച്ചാലും 86 പോയിന്റിൽ മാത്രമെ എത്തൂ.
അൽ ഹിലാലിന്റെ 19ആം സൗദി ലീഗ് കിരീടമാണ് ഇത്. സൗദിയിൽ എത്തി ആദ്യ രണ്ടു സീസണിലും ലീഗ് കിരീടം നേടാൻ ആയില്ല എന്നത് റൊണാൾഡോക്കും ആരാധകർക്കും ക്ഷീണമാകും.