യുഫേഫ കോൺഫറൻസ് ലീഗ് സെമിഫൈനലിൽ ലെസ്റ്റർ സിറ്റിയെ തോൽപ്പിച്ചു എ.എസ് റോമ ഫൈനലിൽ. 1-1 നു അവസാനിച്ച ആദ്യ പാദത്തിനു ശേഷം രണ്ടാം പാദം എതിരില്ലാത്ത ഒരു ഗോളിന് ആണ് റോമ ജയിച്ചത്. മത്സരത്തിൽ കൂടുതൽ പന്ത് കൈവശം വച്ചത് ലെസ്റ്റർ സിറ്റി ആയിരുന്നു എങ്കിലും അവസരങ്ങൾ തുറക്കുന്നതിൽ ഇരു ടീമുകളും ഒപ്പത്തിന് ഒപ്പം ആയിരുന്നു.
പതിനൊന്നാമത്തെ മിനിറ്റിൽ ലോറൻസോ പെല്ലെഗ്രിനിയുടെ കോർണറിൽ നിന്നു ഇംഗ്ലീഷ് താരം ടാമി എബ്രഹാം ആണ് റോമയുടെ വിജയ ഗോൾ നേടിയത്. സീസണിൽ താരം നേടുന്ന 25 മത്തെ ഗോൾ ആയിരുന്നു ഇത്. തുടർന്ന് റോമയെ ശരിയായി പരീക്ഷിക്കാൻ പോലും ആവാതെ ലെസ്റ്റർ പരാജയം സമ്മതിക്കുക ആയിരുന്നു. ഇതോടെ ചാമ്പ്യൻസ് ലീഗ്, യൂറോപ്പ ലീഗ്, കോൺഫറൻസ് ലീഗ് ഫൈനലിൽ എത്തുന്ന ആദ്യ പരിശീലകനായി ജോസെ മൗറീന്യോ മാറി. ജയത്തിന് ശേഷം കണ്ണീർ വാർത്ത മൗറീന്യോ ഒരു അപൂർവ കാഴ്ചയായി.