ബാഡ്മിന്റണ് ലോക ചാമ്പ്യന്ഷിപ്പിന്റെ സെമി ഫൈനലില് എത്തി പിവി സിന്ധു. ഇന്ന് നടന്ന ക്വാര്ട്ടര് ഫൈനലില് പിവി സിന്ധു തായി സു യിംഗിനെ മൂന്ന് ഗെയിം പോരാട്ടത്തിലാണ് കീഴടക്കിയത്. ആദ്യ ഗെയിം പിന്നില് പോയ സിന്ധു രണ്ടാം ഗെയിമിലെ ആവേശകരമായ പോരാട്ടത്തിന് ശേഷമാണ് മത്സരത്തിലേക്ക് ശക്തമായ തിരിച്ചുവരവ് നടത്തിയത്. മൂന്നാം ഗെയിമിലും തായി സു യിംഗ് വമ്പന് ചെറുത്ത് നില്പ് നടത്തിയെങ്കിലും അതിനെ അതിജീവിച്ച് സിന്ധു സെമി ഫൈനലിലേക്ക് കടന്നു.
സ്കോര്: 12-21, 23-21, 21-19. 71 മിനുട്ടാണ് മത്സരം നീണ്ട് നിന്നത്. ഇത് തുടര്ച്ചയായ രണ്ടാം തവണയൊണ് ഇരു താരങ്ങളും ഏറ്റുമുട്ടിയപ്പോള് വിജയം കരസ്ഥമാക്കുവാന് സിന്ധുവിനായത്. അതിന് മുമ്പ് ആറ് തവണ നേരിട്ടപ്പോളും ജയം ചൈനീസ് തായ്പേ താരത്തിനായിരുന്നു.