സ്പെയിൻ തങ്ങളുടെ പ്രഥമ വനിത ലോകകപ്പ് നേടിയതിനു പിന്നാലെ സങ്കടകരമായ വാർത്ത പുറത്ത് വിട്ടു സ്പാനിഷ് ഫുട്ബോൾ ഫെഡറേഷൻ. ലോകകപ്പ് ഫൈനലിൽ ഇംഗ്ലണ്ടിന് എതിരെ ഏക ഗോൾ നേടിയ ക്യാപ്റ്റൻ ഓൽഗ കാർമോണയുടെ അച്ഛന്റെ മരണ വാർത്തയാണ് അവർ പുറത്ത് വിട്ടത്. ലോകകപ്പ് ഫൈനലിന് മുമ്പ് താരത്തിന്റെ അച്ഛൻ മരിച്ചിരുന്നു എങ്കിലും താരം ഈ വാർത്ത അറിയുന്നത് ഫൈനലിന് ശേഷം ആയിരുന്നു.
ഈ ദുഖകരമായ നിമിഷത്തിൽ ഓൽഗക്കും കുടുംബത്തിനും ഒപ്പം നിൽക്കുന്നു എന്നു പറഞ്ഞ സ്പാനിഷ് ഫെഡറേഷൻ എല്ലാവരും താരത്തിന് ഒപ്പം ആണെന്നും ഓൽഗ സ്പാനിഷ് ചരിത്രത്തിന്റെ ഭാഗം ആണെന്നും കൂട്ടിച്ചേർത്തു. ലോകകപ്പ് ഫൈനലിൽ താൻ നേടിയ ഗോൾ ഈ അടുത്ത് തന്റെ അമ്മയെ നഷ്ടമായ തന്റെ ഏറ്റവും അടുത്ത സുഹൃത്തിന് ആയിരുന്നു ഓൽഗ സമർപ്പിച്ചത്. ജേഴ്സി ഉയർത്തി ആയിരുന്നു റയൽ മാഡ്രിഡ് താരമായ ഓൽഗ അത് പ്രകടിപ്പിച്ചത്.