വിന്ഡീസിനെതിരെ ടി20 അരങ്ങേറ്റം കുറിച്ച നവ്ദീപ് സൈനിയോട് വിന്ഡീസിനെതിരെയുള്ള ടെസ്റ്റ് പരമ്പരയില് കരുതില് താരമായി നില്ക്കുവാന് ആവശ്യപ്പെട്ട് ബോര്ഡ്. ടി20യിലെ അരങ്ങേറ്റ മത്സരത്തില് മൂന്ന് വിക്കറ്റും മാന് ഓഫ് ദി മാച്ച് പുരസ്കാരവും താരം സ്വന്തമാക്കിയിരുന്നു. താരം പ്രധാനമായും നെറ്റ് ബൗളറായിയാവും ടീമിനൊപ്പം തുടരുന്നതെങ്കിലും ഇന്ത്യയുടെ ഭാവി ടെസ്റ്റ് താരമായി സൈനിയെ അവതരിപ്പിക്കുവാനുള്ള ശ്രമത്തിലാണ് ഇന്ത്യന് മാനേജ്മെന്റ് എന്നാണ് അറിയുവാന് കഴിയുന്നത്.
ടെസ്റ്റ് സ്ക്വാഡിന്റെ ഭാഗമല്ലായിരുന്നിട്ട് കൂടി വിന്ഡീസ് എയ്ക്കെതിരെയുള്ള പരിശീലന മത്സരത്തില് സൈനിയ്ക്ക് ആറോവര് എറിയുവാന് ടീം അവസരം നല്കിയിരുന്നു. സൈനി റെഡ് ബോള് ക്രിക്കറ്റില് ആഭ്യന്തര തലത്തില് ശ്രദ്ധേയമായ പ്രകടനമാണ് നടത്തി വരുന്നത്. ബൗളിംഗ് കോച്ച് ഭരത് അരുണിനൊപ്പം നിന്ന് താരം തന്റെ കഴിവുകള് മെച്ചപ്പെടുത്തുകയെന്ന ലക്ഷ്യവും ടീം മാനേജ്മെന്റിനുണ്ട്.