വിയറ്റ്നാമിനെ ഏകപക്ഷീയമായ ഒരു ഗോളിന് തോൽപ്പിച്ച് ഇന്ത്യൻ എ.എഫ്.സി അണ്ടർ 16ചാമ്പ്യൻഷിപ്പിൽ തുടക്കം ഗംഭീരമാക്കി. മത്സരത്തിനിടെ തുടക്കം മുതൽ ഒടുക്കം വരെ മികച്ച പ്രകടനം ഇന്ത്യ കാഴ്ചവെച്ചെങ്കിലും ഫിനിഷിങ്ങിലെ പോരാഴ്മകൾ ഇന്ത്യക്ക് തിരിച്ചടിയാവുകയായിരുന്നു. വിയറ്റ്നാം ഗോൾ കീപ്പറുടെ മികച്ച പ്രകടനവും അവരുടെ തുണക്കെത്തി. പ്രതിരോധ നിരയിൽ മലയാളി താരം ഷബാസ് അഹമ്മദിന് അവസരം കൊടുത്തുകൊണ്ടാണ് ഇന്ത്യ മത്സരം തുടങ്ങിയത്.
തുടർന്ന് മത്സരം അവസാനിക്കാൻ മിനുട്ടുകൾ മാത്രം ബാക്കി നിൽക്കെയാണ് ഇന്ത്യ വിജയ ഗോൾ കണ്ടെത്തിയത്. ക്യാപ്റ്റൻ വിക്രം പ്രതാപിന്റെ മികച്ച മുന്നേറ്റത്തിനൊടുവിൽ ലഭിച്ച പെനാൽറ്റി വിക്രം തന്നെ ഗോളാക്കിയാണ് ഇന്ത്യക്ക് വിജയം സമ്മാനിച്ചത്. മത്സരത്തിന്റെ ഭൂരിഭാഗവും നിയന്ത്രിച്ച ഇന്ത്യക്ക് പലപ്പോഴും ഗോൾ നേടനാവാതെ പോയതാണ് തിരിച്ചടിയായത്.