സൂപ്പർ 12ലെ അവസാന മത്സരത്തിൽ ഇന്ത്യ സിംബാബ്വെയെ തോൽപ്പിച്ചതോടെ ഇന്ത്യ ഗ്രൂപ്പിൽ ഒന്നാം സ്ഥാനം ഉറപ്പിച്ചു. ഒപ്പം ലോകകപ്പ് സെമി ഫൈനൽ ഫിക്സ്ചറും ഇതോടെ തീരുമാനം ആയി. ഇന്ത്യക്ക് ഇംഗ്ലണ്ടും പാകിസ്താന് ന്യൂസിലൻഡും ആകും സെമിയിലെ എതിരാളികൾ. നവംബർ 9ന് ഉച്ചക്ക് ഇന്ത്യൻ സമയം 1.30ന് നടക്കുന്ന ആദ്യ സെമിയിൽ ന്യൂസിലൻഡ് പാകിസ്താനെ നേരിടും. സിഡ്നി ക്രിക്കറ്റ് ഗ്രൗണ്ടിൽ ആകും ഈ മത്സരം നടക്കുക.
നവംബർ 10ന് ഉച്ചക്ക് 1.30ന് നടക്കുന്ന മത്സരത്തിൽ ഇന്ത്യ ഇംഗ്ലണ്ടിനെയും നേരിടും. ഇന്ത്യയുടെ സെമി മത്സരം അഡ്ലൈഡിൽ വെച്ചാകും നടക്കുക. ഇന്ത്യ പാകിസ്താൻ എന്ന സ്വപന ഫൈനൽ നടക്കാനുള്ള സാധ്യതയും ഇതോടെ സജീവമായി. ഇരു ടീമുകളും സെമി ജയിച്ചാൽ ഫൈനലിൽ ഒരു വമ്പൻ പോരാട്ടം തന്നെ കാണാം. സൂപ്പർ 12ലെ ആദ്യ മത്സരത്തിൽ ഇന്ത്യയും പാകിസ്താനും ഏറ്റുമുട്ടിയപ്പോൾ കോഹ്ലിയുടെ മികവിൽ ഇന്ത്യ വിജയം സ്വന്തമാക്കിയിരുന്നു.