ഹീറോ ഐ ലീഗിൽ രണ്ടാം മത്സരത്തിലും ജയം കണ്ടു ഗോകുലം കേരള എഫ്.സി. മുൻ ചാമ്പ്യന്മാരായ ഐസ്വാളിനെ ആണ് തുടർച്ചയായ മൂന്നാം ഐ ലീഗ് കിരീടം ലക്ഷ്യം വക്കുന്ന ഗോകുലം മറികടന്നത്. ഗോൾ രഹിതമാവും എന്നു തോന്നിയ ആദ്യ എവേ മത്സരത്തിൽ അവസാന നിമിഷം ആണ് ഗോകുലം ജയം പിടിച്ചെടുത്തത്.
88 മത്തെ മിനിറ്റിൽ അർജുൻ ജയരാജിന്റെ ക്രോസിൽ നിന്നു രണ്ടാം പകുതിയിൽ പകരക്കാരനായി ഇറങ്ങിയ താഹിർ സമാൻ ഹെഡറിലൂടെ ഗോകുലത്തിനു ജയം സമ്മാനിക്കുക ആയിരുന്നു. സീസണിൽ താരത്തിന്റെ ആദ്യ ലീഗ് ഗോൾ ആണ് ഇത്. ജയത്തോടെ ഗോകുലം ലീഗിൽ ഒന്നാം സ്ഥാനത്തേക്കും ഉയർന്നു. സീസണിൽ ആദ്യ പരാജയം നേരിട്ട ഐസ്വാൾ ഒരു പോയിന്റും ആയി ലീഗിൽ ഏഴാം സ്ഥാനത്ത് ആണ്.