24ാമത് എംപിഎസ് – ഇന്ത്യ സെലസ്റ്റിയല് ഓള് കേരള ടൂര്ണ്ണമെന്റിന്റെ ക്വാര്ട്ടര് ഫൈനല് മത്സരങ്ങള് മാര്ച്ച് 15നു ആരംഭിക്കും. അന്നേ ദിവസം രണ്ട് വേദികളിലായി ക്വാര്ട്ടര് ഫൈനല് മത്സരങ്ങളെല്ലാം തന്നെ ആരംഭിക്കും. കെസിഎ ഗ്രൗണ്ട് മംഗലപുരത്തും സെയിന്റ് സേവിയേഴ്സ് ഗ്രൗണ്ട് തുമ്പയിലുമായാണ് മത്സരങ്ങള് നടക്കുക. വെള്ളിയാഴ്ച മംഗലപുരം കെസിഎ ഗ്രൗണ്ടില് നടക്കുന്ന ആദ്യ മത്സരത്തില് മുത്തൂറ്റ് യമഹ മാസ്റ്റേഴ്സ് സിസിയും സ്വാന്റണ്സ് സിസിയും ഏറ്റുമുട്ടും. രാവിലെ 8 മണിയ്ക്കാണ് ആദ്യ മത്സരം.
തുടര്ന്ന് അതേ വേദിയില് നടക്കുന്ന മത്സരത്തില് ഉച്ചയ്ക്ക് 12.30യ്ക്ക് നിലവിലെ റണ്ണേഴ്സ് അപ്പായ ഗ്ലോബ്സ്റ്റാര് സിസിയും തൃപ്പൂണിത്തുറ സിസിയും ഏറ്റുമുട്ടും. രണ്ടാമത്തെ വേദിയായ സെയിന്റ് സേവിയേഴ്സ് ഗ്രൗണ്ടില് രാവിലെ എട്ട് മണിയ്ക്ക് നിലവിലെ ചാമ്പ്യന്മാരായ മാസ്റ്റേഴ്സ് റോയല് സെഞ്ചൂറിയണ് സിസ എ ടീമും പ്രതിഭ സിസിയും ഏറ്റുമുട്ടും. രണ്ടാം മത്സരത്തില് 12.30യ്ക്ക് മുത്തൂറ്റ് എറണാകുളം സിസിയും ഏജീസ് ഓഫീസ് റിക്രിയേഷന് ക്ലബ്ബും ഏറ്റുമുട്ടും.
സെമി ഫൈനല് മത്സരങ്ങള് മാര്ച്ച് 16നും ഫൈനല് ഞായറാഴ്ച മാര്ച്ച് 17നും നടക്കും.