ഫസ്റ്റ് ക്ലാസ് ക്രിക്കറ്റിലെ അരങ്ങേറ്റത്തിൽ ആദ്യ ഓവറിൽ തന്നെ ഹാട്രിക് നേടി ചരിത്രം സൃഷ്ടിച്ച് മധ്യപ്രദേശ് താരം രവി യാദവ്. ഉത്തർപ്രദേശിനെതിരായ രഞ്ജി ട്രോഫി മത്സരത്തിലാണ് 28കാരനായ രവി യാദവ് ചരിത്രം സൃഷ്ട്ടിച്ചത്. ഈ നേട്ടം സ്വന്തമാക്കുന്ന രണ്ടാമത്തെ താരമാണ് രവി യാദവ്. ഉത്തർപ്രദേശ് താരങ്ങളായ ആര്യൻ ജൂയാൽ, അങ്കിത് രാജ്പുത്, സമീർ റിസ്വി എന്നിവരെയാണ് രവി യാദവ് പുറത്താക്കിയത്.
ഇതിന് മുൻപ് ഈ നേട്ടം സ്വന്തമാക്കിയത് ദക്ഷിണാഫ്രിക്കൻ താരം റിസ് ഫിലിപ്പ് ആണ്. 1939-40 ഫസ്റ്റ് ക്ലാസ് സീസണിലാണ് റിസ് ഫിലിപ്പ് ഈ നേട്ടം സ്വന്തമാക്കിയത്. അതെ സമയം റിസ് ഫിലിപ്പ് അതിന് മുൻപ് കളിച്ച നാല് മത്സരങ്ങളിൽ ബൗൾ ചെയ്തിരുന്നില്ല. നേരത്തെ 7 ഇന്ത്യൻ താരങ്ങൾ ഫസ്റ്റ് ക്ലാസ് ക്രിക്കറ്റിലെ അരങ്ങേറ്റത്തിൽ ഹാട്രിക് നേടിയിരുന്നു. ജവഗൽ ശ്രീനാഥ്, സലിൽ അംഗോള, അഭിമന്യു മിഥുൻ എന്നിവരും അരങ്ങേറ്റത്തിൽ ഹാട്രിക് നേടിയവരാണ്.