തുടക്കത്തിലെ പതർച്ചക്ക് ശേഷം ശക്തമായി തിരിച്ചുവന്ന റോജർ ഫെഡറർ ക്വാർട്ടർ ഫൈനലിലും ഒരു സെറ്റ് പോലും എതിരാളിക്ക് അടിയറ വയ്ക്കാതെ ജയിച്ചു കയറി. ചെക്ക് റിപ്പബ്ലിക്കിന്റെ തോമസ് ബെർഡിക്കിനെതിരെ ആയിരുന്നു നേരിട്ടുള്ള സെറ്റുകൾക്ക് ഫെഡററുടെ വിജയം. മറ്റൊരു ക്വാർട്ടർ ഫൈനൽ മത്സരത്തിൽ ദക്ഷിണ കൊറിയയുടെ ചൊങ് അമേരിക്കയുടെ സാൻഡ്ഗ്രീനെ തകർത്ത് സെമിയിൽ പ്രവേശിച്ചു. നേരിട്ടുള്ള സെറ്റുകളിലായിരുന്നു ഈ യുവ കൊറിയൻ താരത്തിന്റെ വിജയവും. ജോക്കോവിച്ചെനെതിരെ പുറത്തെടുത്ത മികവ് ഇന്നത്തെ മത്സരത്തിലും ആവർത്തിച്ച ചൊങ് സെമിയിൽ റോജർക്ക് വെല്ലുവളിയാവും എന്നതിൽ സംശയമില്ല.
വനിതകളിൽ മുൻ ഒന്നാം സീഡ് ജർമ്മനിയുടെ കെർബർ സെമിയിൽ പ്രവേശിച്ചു. അമേരിക്കയുടെ മാഡിസൺ കീസിനെതിരെ അനായാസമായിരുന്നു കെർബറുടെ വിജയം. മറ്റ് ക്വാർട്ടറിൽ നിലവിലെ ഒന്നാം സീഡായ റുമാനിയയുടെ സിമോണ ഹാലെപ് സെമിയിൽ പ്രവേശിച്ചു. ആറാം സീഡ് പ്ലിസ്കോവയെ ആണ് ഹാലെപ് നേരിട്ടുള്ള സെറ്റുകളിൽ പരാജയപ്പെടുത്തിയത്. മിക്സഡ് ഡബിൾസിൽ ഇന്ത്യൻ പ്രതീക്ഷയായ ബൊപ്പണ്ണ അടങ്ങിയ ബൊപ്പണ്ണ ബബോസ് സഖ്യം സെമിയിൽ പ്രവേശിച്ചു. ബൊപ്പണ്ണയുടെ കൂട്ടാളി ബബോസ് വനിതകളുടെ ഡബിൾസ് വിഭാഗത്തിൽ ഫൈനലിൽ ഇടം നേടിയിട്ടുണ്ട്.
കൂടുതൽ കായിക വാർത്തകൾക്ക് : www.facebook.com/FanportOfficial
