കരിയറിലെ ഏറ്റവും വലിയ കിരീട നേട്ടവും ആയി അമേരിക്കൻ യുവതാരം കൊക്കോ ഗോഫ്. ഡബ്യു.ടി.എ 1000 സിൻസിനാറ്റി ഓപ്പൺ ഫൈനലിൽ ഏഴാം സീഡ് ആയ കൊക്കോ ചെക് താരം കരോളിന മുകോവയെ നേരിട്ടുള്ള സെറ്റുകൾക്ക് ആണ് തോൽപ്പിച്ചത്. ഇതോടെ സിൻസിനാറ്റിയിൽ കിരീടം ഉയർത്തുന്ന ഏറ്റവും പ്രായം കുറഞ്ഞ താരമായി 19 കാരിയായ ഗോഫ്.
മത്സരത്തിൽ 5 തവണ എതിരാളിയുടെ സർവീസ് ബ്രേക്ക് ചെയ്ത കൊക്കോ 6-3, 6-4 എന്ന സ്കോറിന് ആണ് മത്സരം ജയിച്ചത്. സ്വന്തം സർവീസിൽ മുകോവ മൂന്നു തവണ മാച്ച് പോയിന്റ് രക്ഷിച്ചു എങ്കിലും അനിവാര്യമായ പരാജയം ഒഴിവാക്കാൻ ആയില്ല. കരിയറിലെ ആദ്യ ഡബ്യു.ടി.എ 1000 കിരീട നേട്ടവും ആയി യു.എസ് ഓപ്പണിൽ എത്തുന്ന കൊക്കോ എതിരാളികൾക്ക് ഭീഷണി തന്നെയാവും ഉയർത്തുക എന്നുറപ്പാണ്.